ހާހަކަށް ވުރެ ގިނަ މުވައްޒިފުންނާއެކު އާބަންކޯ އިން އެއްބައިވަންތަކަމުގެ ދުވަސް ފާހަގަކޮށްފި

އާބަންކޯ އިން ހުޅުމާލޭ ގައި ގައުމީ އެއްބައިވަންތަ ކަމުގެ ދުވަސް ފާހަގަ ކޮށްފި އެވެ. 

ގައުމީ އެއްބައިވަންތަކަމުގެ ދުވަސް ފާހަގަކުރުމަށް ހުޅުމާލޭ ސެންޓްރަލް ޕާކުގައި މިއަދު ހެނދުނު 8:30 ފެށިގެން ކުރިއަށް ގެންދިޔަ ހަފްލާގައި އާބަންކޯގެ މުވައްޒަފުންގެ އިތުރުން ސަރުކާރުގެ އިދާރާތަކާއި އަމިއްލަ ކުންފުނިތައް ހިމެނޭހެން 1000 އަށްވުރެ ގިނަ މުވައްޒަފުން ބައިވެރިވިއެވެ.

މި ފަހްލާގައި ސުނާމީ ކާރިސާގައި ނިޔާވި އަދި ގެއްލުނު މީހުންގެ ހަނދާނުގައި މިނިޓެއްގެ ސުކޫތެއް ވަނީ ގެނެސްފައެވެ.

މިއަދުގެ މި ހަފްލާ ޝަރަފުވެރި ކޮށްދެއްވީ މިނިސްޓާ އޮފް ދިވެހި ލެންގުއޭޖް، ކަލްޗާ އެންޑް ހެރިޓޭޖް އާދަމް ނަސީރު އިބްރާހީމް އެވެ. ހަފްލާގެ ބައިވެރިންނާ މުހާތަބު ކުރައްވައި މިނިސްޓަރު ވަނީ ދިވެހިން އެއްބައިވަންތަ ބައެއްގެ ގޮތުގައި ދެމިތިބުމުގެ މުހިންމު ކަން ފާހަގަ ކުރައްވާއެވެ. އަދި ދިވެހިންނަކީ އެއް ލޭ ހިނގާ އެއް އާއިލާ އެއް ކަމަށާ އެއްބައިވަންތަކަން ބީވިޔަދީގެން ނުވާނެ ކަން މިނިސްޓަރު ފާހަގަ ކުރެއްވި އެވެ.

އެއްބައިވަންތަކަމުގެ ދުވަސް ފާހަގަކުރަނީ 2004 ވަނަ އަހަރު ޑިސެންބަރު 26 ވަނަ ދުވަހު ކުރިމަތިވި ސުނާމީ ކާރިސާގައި ދިވެހިން ދައްކައިދިން އެއްބައިވަންތަކަމުގެ ރަމްޒެއްގެ ގޮތުންނެވެ.

ސުނާމީ ކާރިސާ އަށް ފަހު ކޮން އަހަރަކު ވެސް ޑިސެމްބަރު 26 ވަނަ ދުވަސް ގައުމީ އެއްބައިވަންތަކަމުގެ ދުވަހުގެ ގޮތުގައި ރާއްޖޭގެ ހުރިހައި ރަށެއްގައި ފާހަގަ ކުރެއެވެ.

މިފަދަ ގައުމީ މުނާސަބަތުތަކާއި ދުވަސްތައް ފާހަގަކުރުމަށް އާބަންކޯ އިން އަބަދުވެސް އިސްކަން ދެއެވެ.އަދި މިފަދަ ގައުމީ މުނާސަބަތުތަކުގައި އާބަންކޯގެ މުވައްޒަފުންގެ ފުރިހަމަ ބައިވެރިވުން އަބަދުވެސް ފެނެއެވެ.