މުސާރަ ބޮޑު ކުރަން ނިންމީ އެނގިގެނެއް، އެދިގެނެއް ނޫން، އެއީ ނަފުރަތު އުފެއްދުމެއް: ސަރުކާރު

ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު އަދި ވަޒީރުންގެ މުސާރަ ބޮޑު ކުރުމަށް ރައްޔިތުންގެ މަޖިލީހުގެ ކޮމިޓީއަކުން ނިންމީ ރައީސުލްޖުމްހޫރިއްޔާގެ އެދިވަޑައިގަތުމަކާ ގުޅިގެންނެއް ނޫން ކަމަށާއި އެއީ ރައީސުލްޖުމްހޫރިއްޔާ ތާއީދު ކުރައްވާ ނިންމުމެއް ވެސް ނޫން ކަމަށް ސަރުކާރުން ބުނެފި އެވެ.

ރައީސް އޮފީހުގެ ޗީފް ސްޕޯކްސް ޕާސަން މުހައްމަދު ޝަހީބު މިއަދު ވިދާޅުވީ ސަރުކާރުގެ އެންމެ އިސް މަސްއޫލުވެރީންގެ މަޝްވަރާއެއް ވެސް ހޯއްދެވުމަކާ ނުލައި މިފަދަ ހާއްސާސް ނިންމުމެއް ރައްޔިތުންގެ މަޖިލީހުގައި އެމްޑީޕީގެ ބޮޑު އަޣުލަބިއްޔަތެއް އޮތް ކޮމެޓީއަކުން މި ދަނޑިވަޅު ނިންމުމަކީ ސަރުކާރާމެދު ރައްޔިތުންގެ ހިތްތަކުގައި ނަފުރަތު އުފެއްދުން ކަމުގައި ސަރުކާރުން ދެކޭ ކަމަށެވެ.

ރައްޔިތުންގެ މަޖިލީހުގެމާލިއްޔަތު ކޮމެޓީ އެއްވެލައި އިއްޔެ މަޖިލީހުގެ މެންބަރުންގެ މުސާރަ ބޮޑު ކުުރުން ހިމެނޭހެން ދައުލަތުގެ އިސްވެރީންނާއި ބައެއް މިނިވަން މުއައްސަސާތަކުގެ ވެރީންގެ މުސާރަ ބޮޑު ކުރަން ވަނީ ނިންމާފަ އެވެ.

އެގޮތުން އެ ކޮމެޓީން ވަނީ މަޖިލީހުގެ މެންބަރުންނަށް މިހާރު ލިބޭ މުސާރައިގެ ތެރެއަށް 20،000ރ. އިތުރުކޮށް ރައީސުލްޖުމްހޫރިއްޔާއަށް މިހާރު ލިބިވަޑައިގަންނަވާ މުސާރަ، 100،000ރ. މެންބަރުންނަށް ލިބޭނެ ގޮތަށް މުސާރައިގެ އޮނިގަނޑަށް ބަދަލު ގެނެސްފައި ވެއެވެ. 

އެއީ އަސާސީ މުސާރައިގެ ގޮތުގައި 57،000ރ. އާއި ލިވިން އެލަވަންސްގެ ގޮތުގައި 25،000ރ. އަދި ކޮމެޓީ އެލަވަންސްގެ ގޮތުގައި 20،000ރ. އެވެ.

އެ ނިންމުމުގެ ކުރިއަށް މަޝްވަރާ ކުރީ 102،000ރ. ލިބޭނެ ގޮތަށް ކަނޑައެޅުމަށެވެ. ނަމަވެސް މެންބަރުން އެކުވެ ކުރިއަށް ގެންދިޔަ "ސިއްރު" މަޝްވަރާތަކަކަށް ފަހު 2،000ރ. އުނިކޮށް މެންބަރުންގެ މުސާރައަކީ 100،000ރ. ކަމުގައި ކަނޑައަޅާ އެގޮތަށް ނިންމީ އެވެ.

މަޖިލީހުގެ ރައީސްގެ މުސާރަ 73،000ރ. އިން 90،000ރ. އަށް ބޮޑުކޮށް މަޖިލީހުގެ ނައިބު ރައީސްގެ މުސާރަ 71،000ރ. އިން 88،000ރ. ބޮޑު ކުރަން ވެސް ކޮމެޓީން ފާސް ކުރީ އެވެ.

އަދި ރައީސުލްޖުމްހޫރިއްޔާގެ މުސާރައަށް ވެސް 20،000ރ. އިތުރު ކޮށް ނައިބު ރައީސްގެ މުސާރަ އާއި ވަޒީރުންނަށް ލިބިވަޑައިގަންނަވާ މުސާރަ އާއި އުއްތަމަފަނޑިޔާރަށް ލިބިވަޑައިގަންނަވާ މުސާރަ ވެސް އިތުުރު ކުރައްވަން ނިންމި އެވެ. އެގޮތުން ރައީސުލްޖުމްހޫރިއްޔާއަށް 120،000ރ. އެވެ. ނައިބު ރައީސަށް 93،000ރ. އެވެ. ވަޒީރުންނަށް 72،000ރ. އުއްތަމަ ފަނޑިޔާރަށް 91،000ރ. އެވެ. ޕްރޮސެކިއުުޓަރު ޖެނެރަލް އާއި އޮޑިޓަރު ޖެނެރަލާއި ގަވަރުނަރަށް 74،000ރ. ގެ މުސާރަ އެކެވެ. 

މި ގޮތަށް ފާސްކުރީ ކުރީ މާލިއްޔަތު ކޮމެޓީގެ ހުރިހާ މެންބަރުންގެ ފުރިހަމަ ރުހުމާއެކު އެވެ. އެމްޑީޕީގެ މެންބަރުން އިސްވެ ހުށައެޅި މި ހުށައެޅުމަށް އިއުތިރާޒު ކުރާނެ އެއްވެސް މެންބަރަކު ނެތެވެ. ދެން އޮތީ މަޖިލީހުގެ ތަޅުމަށް އެކަން ގެނެސް ފާސްކޮށް އަމަލު ކުރާން ލާޒިމު ކުރުމެވެ.

ކޮމެޓީގެ މި ނިންމުމާ ގުޅިގެން އާންމުންގެ އެތައް ބަޔަކު ދަނީ މަޖިލީހަށާއި މަޖިލީހުގެ މާލިއްޔަތު ކޮމެޓީއަށް ވަރަށް ބޮޑަށް ފާޑު ކިޔަމުންނެވެ.