ޗައިނާ-އިންޑިއަން އޯޝަން ރީޖަން ފޯރަމަށް ނައިބު ރައީސް ޗައިނާއަށް

"ޗައިނާ-އިންޑިއަން އޯޝަން ރީޖަން ފޯރަމް އޮން ޑިވެލޮޕްމަންޓް ކޯޕަރޭޝަން" ގައި ބައިވެރިވެވަޑައިގަތުމަށް ނައިބު ރައީސް ހުސައިން މުހައްމަދު ލަތީފު ރަސްމީ ދަތުރުފުޅެއްގައި ރޭ ޗައިނާއަށް ފުރާވަޑައިގެންފި އެވެ.

ޗައިނާ-އިންޑިއަން އޯޝަން ރީޖަން ފޯރަމް އޮން ޑިވެލޮޕްމަންޓް ކޯޕަރޭޝަން - ސީއައިޑީސީއޭ އިން އިންތިޒާމު ކުރާ މި ފޯރަމް އޮންނާނީ މި މަހުގެ 7 އިން 8 އަށް ޗައިނާގެ ޔުނާން ޕްރޮވިންސްގެ ކުންމިންގަ އެވެ.

‎މި ފޯރަމްގައި ނައިބު ރައީސް ތަގުރީރު ކުރައްވާނެ އެވެ. އަދި ޗައިނާގެ ބައެއް އޮފިޝަލުންނާ ބައްދަލު ކުރައްވާނެ އެވެ. ނައިބު އަރިހުގައި އިކޮނޮމިކް މިނިސްޓަރު މުހައްމަދު ސައީދު ބައިވެރިވެވަޑައިގަންނަވަ އެވެ.

‎ނައިބު ރައީސް މާލެ ވަޑައިގަންނަވާނީ މި މަހުގެ 11 އިން 12 އަށް ސްވިޒަލޭންޑްގެ ޖެނީވާގައި ބާއްވާ ޔުނިވާސަލް ޑިކްލަރޭޝަން އޮފް ހިއުމަން ރައިޓްސްއަށް 75 އަހަރު ފުރުމުގެ މުނާސަބަތުގައި ބާއްވާ މަތީ ފަންތީގެ ރަސްމިއްޔާތުގައި ބައިވެރިވެވަޑައިގަތުމަށްފަހު އެވެ.