ބުޅަލު ބަނޑަށް ވަޅިހެރި މީހާގެ ބަންދަށް އިތުރު 10 ދުވަސް

މާލޭ މަގުމަތިން ބުޅަލަކަށް ވަޅިން ހަމާދިން މީހާގެ ބަންދަށް ކްރިމިނަލް ކޯޓުން 10 ދުވަސް އިތުރު ކޮށްދީފި އެވެ.

އެ ހަލައަށް ފަހު މިދިޔަ ނޮވެމްބަރު މަހުގެ 13 ވަނަ ދުވަހު ހައްޔަރުކުރީ މ. ކޮޅުފުށި، ޖަވާހިރުވާދީ، އަހްމަދު ނަސީމް 45، އެވެ. އަދި އޭނާ 15 ދުވަހު ބަންދުގައި ބެހެއްޓުމަށް ކްރިމިނަލް ކޯޓުން އަމުރުކުރީ އެ މަހުގެ 18 އިގަ އެވެ.

ފުލުހުން ބުނީ ނަސީމް، ބަންދުގައި ބެހެއްޓުމަށް ކޯޓުން ކުރި އަމުރުގެ މުއްދަތު ހަމަވުމާ ގުޅުވައިގެން އަލުން ކޯޓަށް ހާޒިރުކުރުމުން އޭނާގެ ބަންދަށް 10 ދުވަސް އިތުރު ކޮށްދީފައިވާ ކަމަށެވެ.

މާލޭގެ އަމީރު އަހްމަދު މަގާއި ކަސްތޫރި މަގު ގުޅޭ ކަންމަތީގައި ހުންނަ ފިހާރައެއް ކައިރީ ކާން އޮތް ބުޅަލަކަށް އެ މީހާ ހަމަލާ ދޭ ވީޑިއޯއެއް ސޯޝަލް މީޑިއާގައި އާންމުވެފައި ވެއެވެ. އެ ވީޑިއޯއިން ފެންނަ ގޮތުގައި ދުވާރުމަތީގައި އޮތް ބުޅަލަކާ އެމީހާ ގާތްވެ، އެ ބުޅަލުގެ ކައިރިއަށް މަޑުކޮށްލާފައި ޖީބުން ވަޅިއެއް ނަގައި ބުޅަލުގެ ބަނޑަށް ހަރާލަނީ އެވެ. 

ހަމަލާއަށް ފަހުއެ ބުޅާ، އެދުވަހު މަރުވެފައިވެ އެވެ.