ޑިމޮކްރެޓްސް އިންތިހާބުގެ ނަތީޖާ އިއުލާނު ކުރަނީ މިރޭ

އިއްޔެ ބޭއްވި ދަ ޑިމޮކްރެޓްސްގެ އެތެރޭގެ އިންތިހާބުގެ ވަގުތީ ނަތީޖާ މިރޭ އިއުލާނު ކުރާނެ ކަމަށް އެ ޕާޓީން ބުނެފި އެވެ.

ޑިމޮކްރެޓުންގެ ފުރަތަމަ އިންތިހާބުގައި ޕާޓީގެ ރައީސާއި ނައިބު ރައީސް ހިމެނޭހެން 23 މަގާމަކަށް ބޭފުޅުން އިންތިހާބު ކުރަން އިއްޔެ ވަނީ ވޯޓް ނަގާފަ އެވެ. މާލޭގެ އިތުރު ރާއްޖޭގެ އެކި ކަންކޮޅުތަކުގައި އިއްޔެ ހަވީރު 4:00 އާ ހަމަޔަށް ވަނީ ވޯޓްލުން ކުރިއަށް ގެންގޮސްފަ އެވެ.

އާންމު ގޮތެއްގައި އިންތިހާބުތަކުގެ ވަގުތީ ނަތީޖާ، ވޯޓްލާ ނިމޭތާ ދެ ގަޑިއިރެއްހާއިރު ތެރޭގައި އެނގިގެންދެ އެވެ. ނަމަވެސް ރޭ އެ ޕާޓީން އިއުލާނުކޮށްފައި ވަނީ ވަގުތީ ނަތީޖާ އިއުލާނު ކުރާނީ މިއަދު ކަމަށެވެ. މިއަދު އިއުލާނު ކުރާނެ ވަކި ވަގުތެއް ނުބުނާތީ އާންމު މެމްބަރުން ކަންބޮޑުވުން ފާޅުކުރަމުން ދަނިކޮށް އެޕާޓީން އިރުކޮޅެއް ކުރިން ބުނެފައި ވަނީ މިރޭ ވަގުތީ ނަތީޖާ އިއުލާނު ކުރާނެ ކަމަށެވެ.

ނަތީޖާ އިއުލާނު ކުރާނީ މިރޭ 8:00 ގައި އެ ޕާޓީގެ އޮފީހުގަ އެވެ. ނަތީޖާ އިއުލާނު ކުރުން ލަސްވެގެން ގޮސްފައިވާ ސަބަބެއް އެ ޕާޓީން ބުނެދީފައެއް ނުވެ އެވެ.

މި އިންތިހާބުގައި އެންމެ ވާދަވެރީ ޕާޓީގެ ރައީސްގެ މަގާމަށެވެ. އެ މަގާމަށް ކުރިމަތި ލެއްވީ ޕާޓީގެ މުއައްސިސް ހަސަން ލަތީފާއި އެސްޓީއޯގެ ކުރީގެ މެނޭޖިން ޑިރެކްޓަރު ހަސަން އަމްރެވެ. ދެ ބޭފުޅުން ވެސް ރޭ ވަނީ މޮޅުވިކަން އިއުލާނު ކުރައްވާފަ އެވެ. އެއަށްފަހު ޕާޓީގެ ތެރޭގައި ހިޔާލު ތަފާތުވުން ވަނީ އުފެދިފައެވެ.