އަމްރުގެ ހިތްހަމަނުޖެހުމާއި ޝަކުވާ، ދެން އިތުރަށް ޝަކުވާ ނުކުރައްވާނެ
"މަސްލަހަތަށްޓަކައި ފަހަތަށް ޖެހުމަކީ އަޅުގަނޑު ނުކުރާނެ ކަމެއް ނޫން. އެއީ މި މަަސައްކަތަކީ އަޅުގަނޑު ވެސް ލޯތްބާއި ގުރުބާނީއާ އެކު ކުރި މަސައްކަތެއް ވީމަ،"
ދަ ޑިމޮކްރެޓްސްގެ ރައީސް ހޮވުމަށް އިއްޔެ އޮތް އިންތިހާބުގެ ނަތީޖާއާ މެދު ހިތްހަމަޖެހިވަޑައި ނުގަންނަވާ ކަމަށް އެ މަގާމަށް ވާދަ ކުރެއްވި ހުސައިން އަމްުރު ވިދާޅުވެއްޖެ އެވެ. ނަމަވެސް އަމްރު ވިދާޅުވި ގޮތުގައި އެ ނަތީޖާއާ މެދު އިތުރަށް އެއްވެސް އެއްޗެއް ދަންނަވަން ބޭނުންފުޅެއް ނުވެ އެވެ.
އިންތިހާބުގެ މައުލޫގައި އަމްރު ވަނީ ވަރަށް ތަފްސީލް ކޮށް ދެންމެ ވާހަކަފުޅު ދައްކަވާފައެވެ. އޭނާ ވިދާޅުވީ އިންތިހާބަށް ކުރިމަތި ލައްވަނީ މޮޅުވާ ފަރާތަކާއި ބަލިވާ ފަރާތެއް ވާނެކަން އެނގިވަޑައިގެން ހުންނަވާ ކަމަށެވެ.
"ވަރަށް ގިނަ އިންތިހާބު ގައި ވާދަ ކުރެއްވިއްޖެ. ބައެއް އިންތިހާބު އިރާދަކުރެއްވީތީ ވަރަށް ކާމިޔާބު. އަނެއް ބައި އިންތިހާބުތަކުގައި ނާކާމިޔާބުވީ ނަމަވެސް އެކަމާ ޝަކުވާ އެއް ނުކުރަން،"
އަމްރު ވިދާޅުވީ ފާއިތުވި 15 އަހަރެއްހާ ދުވަހު އޭނާއާއެކު ސިޔާސީ މަސައްކަތް ކުރެއްވި ހުރިހާ ބޭފުޅުންނަށް އެކަން ސާފުވާނެ ކަމަށެވެ. އޭނާއަކީ ދޫދޭން ޖެހޭ ތަންތަނުގައި ބޮޑުކޮށް ދޫ ދެއްވާނެ ބޭފުޅެއް ކަމަށާ އަދި އަސާސްތަކުގައި ހިފަހައްޓަވާނެ ބޭފުޅެއް ކަން ވެސް ސާފުވާނެ އެވެ.
މިސާލުތަކެއްވެސް ފާހަގަ ކުރެއްވި އެވެ. ވިދާޅުވީ އެމްޑީޕީގެ ޗެއާޕާސަންގެ އިންތިހާބަށް ނުކުންނަވާ އޭނާ ފަހަތަށް ޖެހިވަޑައިގަތެވެ. ޑިމޮކްރެޓްސްގެ ރިޔާސީ ކެންޑިޑޭޓްގެ ރޭހަށް ނުކުންނަވާ ވެސް ފަހަތަށް ޖެހިވަޑައިގެންފައިވާނެ ކަމަށެވެ.
"މަސްލަހަތަށްޓަކައި ފަހަތަށް ޖެހުމަކީ އަޅުގަނޑު ނުކުރާނެ ކަމެއް ނޫން. އެއީ މި މަަސައްކަތަކީ އަޅުގަނޑު ވެސް ލޯތްބާއި ގުރުބާނީއާއެކު ކުރި މަސައްކަތެއް ވީމަ،"
އަމްރު ވިދާޅުވީ އެކަން އެހެން އޮތަސް ކަމެއް ގޯހުން ދާކަން ފާހަގަ ވެއްޖެނަމަ އެ ވާހަކައެއް ސީދަލަށް ވިދާޅުވާނެ ކަމަށެވެ. އެ ހިތްވަރާއި ކެރުން ހުންނާނެ ކަމަށެވެ. އެކަން ކުރަނީ އެންމެނަށް ރަނގަޅަކަށް ކަމަށް ވެސް ވިދާޅުވި އެވެ.
ދެން ވިދާޅުވީ އިއްޔެ އޮތް ދަ ޑިމޮކްރެޓްސްގެ އެތެރޭގެ އިންތިހާބާމެދު ހިތްހަމަޖެހިވަޑައިނުގަންނަވާ ކަމަށެވެ. ނަމަވެސް އެ ނަތީޖާއާ މެދު އިތުރަށް އޭނާ އެއްވެސް އެއްޗެއް ނުދަންނަވާނެ ކަމަށެވެ.
"އިންތިހާބުގައި ބުރަ މަަސައްކަތް ކުރެއްވި ފަރާތްތަކަށް ޝުކުރު ދަންނަވަން. އަޅުގަނޑާ އެކު ވަރުބަލި ކަމެއް ފޫހިކަމެއް ނެތި މަސައްކަތް ކޮށް ދެއްވި ކެމްޕެއިން އަދި ސޯޝަލް މީޑިއާ ޓީމާއި ވޯޓް ދެއްވި ހުރިހާ ބޭފުޅުންނަށް ހިތުގެ ފުން މިނުން ޝުކުރު ދަންނަވަން،" އަމްރު ވިދާޅުވި އެވެ.
އިއްޔެ ހަވީރު ނިމުނު އިންތިހާބުގެ ނަތީޖާ އިއުލާނު ކުރާނެ އިރެއް އަދިވެސްް ނުބުނެ އެވެ. ވަރަށް މަދު އަދަދެއްގެ ބަޔަކު ވޯޓް ދިން މި އިންތިހާބުގެ ނަތީޖާ މިހާ ބޮޑަށް ލަސްވުމުން އިންތިހާބުގެ ސައްހަ ކަމާއި މިނިވަން ކަމާމެދު ވަނީ ސުވާލު އުފެދިފައެވެ. ވަގުތީ ނަތީޖާ އިއުލާނު ނުކުރަނީސް އަމްރާ ވާދަ ކުރެއްވި ހަސަން ލަތީފް ވަނީ އިންތިހާބުން މޮޅުވެއްޖެކަން އިއުލާނު ކޮށްފައެވެ. އޭގެ ފަހުން އަމުރު ވެސް ވަނީ މޮޅުވެއްޖެ ކަމަށް ރޭ އިއުލާނު ކޮށްފައެވެ.
ކޮމެންޓް
Republic of Maldives