އިންޑަސްޓްރީއަށް މިނިސްޓަރު އޯކޭ ؛ ބޭނުމީ ވާހަކައެއް ނޫން، ނަތީޖާ

ރޭ ބޭއްވި ބޯޓިން އެވޯޑުގެ ހަފުލާގައި އާ ޓޫރިޒަމް މިނިސްޓަރު އިބްރާހިމް ފައިސަލް ވާހަކަފުޅު ދެއްކެވި ގޮތާމެދު ބައެއް މީހުން ދަނީ ފާޑު ކިޔަމުންނެވެ. މިނިސްޓަރު ފައިސަލަކީ އެ މަގާމަށް ގާބިލު ނޫން މީހެއްގެ ގޮތުގައި ބުނެ ސޯޝަލް މީޑިއާގައި ދަނީ ސުވާލުކޮށް ބަހުސް ކުރާ ބަޔަކު ވެސް އުޅެ އެވެ. 

ނަމަވެސް ޓޫރިޒަމް އިންޑަސްޓްރީ މުޅިންހެން އޮތީ މިނިސްޓަރު ފައިސަލާއެކުގަ އެވެ. އެ ދާއިރާއިން ގާތްގަނޑަކަށް އެންމެން ބުނާ ގޮތަކީ މުހިންމީ މޮޅު ވާހަކަ ދެއްކުންތެރިއެއް ނޫނެވެ. އިންޑަސްޓްރީއާ އެ އިންޑަސްޓްރީގެ ހާލަތު އޮތް ގޮތަށް ބަލައި މުހިންމީ ވާހަކަ ދައްކާ މީހަކަށްވުރެ ނަތީޖާ ނެރެދޭނެ މީހާ އެވެ. 

ރާއްޖޭގެ އިގްތިސޯދުގެ މައި ތަނބު ކަމަށްވާ ޓޫރިޒަމް ސިނާއަތުގައި މަސައްކަތް ކުރައްވާ ގިނަ ބަޔަކު ތިބޭ ޓޫރިޒަމް ގްރޫޕުތައް އޮވެ އެވެ. އެހެން ހުރި ހުރިހާ ގްރޫޕްތަކުގައި ވެސް މިނިސްޓަރުގެ ވާހަކަފުޅުގެ މައްޗަށް ބަހުސް އެބައޮތެވެ. 

އެ ފަދަ އެއް ގްރޫޕެއްގައި ހިޔާލުފާޅު ކުރައްވަމުން މަޓާޓޯގެ ކުރީގެ ރައީސް އަބްދުﷲ ސުއޫދު ވިދާޅުވި ގޮތުގައި ދިމާވެފައި އޮތް ކަމުގެ ޒިންމާ ނަގަން ޖެހޭނީ މިނިސްޓަރުގެ ޕީއޭ އެވެ. 

އޭނާގެ ވާހަކަފުޅާ ވިއްދައި އިނަ މޯލްޑިވްސް ކުންފުނީގެ ވެރިޔާ މުހައްމަދު ފިރާގު ވަނީ މިނިސްޓަރު ފައިސަލްއަކީ މަޖިލީހުން ރުހުން ދީފައިވާ މިނިސްޓަރަކަށް ނުވާތީ ޕީއޭއެއް އަދި ނުހުންނާނެ އެވެ. އޭނާ ވިދާޅުވީ މިވަގުތު އިންޑަސްޓްރީން މިނިސްޓަރަށް ސަޕޯޓް ދޭން ޖެހޭނެ އެވެ. އެ ސްޕީޗްއަކީ މިނިސްޓަރުގެ ފުރަތަމަ ޕަބްލިކް ސްޕީޗެވެ. އިތުބާރު ލިބި ރަނގަޅުވާނެ އެވެ. 

މި ގްރޫޕުގައި ރިސޯޓް ލައިފްގެ ވެރިޔާ މުހައްމަދު ޝާޒް ވަލީދު ވިދާޅުވެފައިވާ ގޮތުގައި މިނިސްޓަރު ފައިސަލްއާ ދެ ފަހަރެއްގެ މަތިން ބައްދަލު ވެއްޖެ އެވެ. އެ ބައްދަލުވުންތަކުގައި ދެކެވުނު ވާހަކަތަކުގައި މިނިސްޓްރީ ތެރޭ ގައި "މާކެޓް އިންޓެލިޖެންސް ޑިޕާމެންޓެއް" ނެތުމުގެ ސަބަބުން ފަތުރުވެރިކަމުގެ މިސްރާބު މީޒާނުން ނެއްޓޭކަން ދެނެގަތުމަށް މިނިސްޓްރީ ނުކުޅެދިފައިވާ ކަން މިނިސްޓަރު ފައިސަލް ގަބޫލުފުޅު ކުރެއްވެވި އެވެ. 

ކޮވިޑް-19 ގައި ރާއްޖޭގެ އިގްތިސޯދު ހިފެހެއްޓުމަށް ރާއްޖެއަށް ރަޝިއާ މާކެޓު އަނބުރާލުމުގައި އެންމެ އިސް ދައުރެއް އަދާކުރެއްވި ވަލީދު ވިދާޅުވި ގޮތުގައި މިނިސްޓަރު ފައިސަލަކީ ތަފާސްހިސާބުތަކާއި މާކެޓަަށް އަންނަ ބަދަލު ދެނެގަނެ އަޅާންޖެހޭ ފިޔަވަޅުތައް އަޅަން ކެރި ވަޑައިގަންނަވާނެ ބޭފުޅެއްކަން ކަށަވަރު ކޮށްދެއްވާފައި ވެއެވެ. 

މިނިސްޓަރު ފައިސަލްގެ ވާހަކަފުޅާ ބެހޭ ގޮތުން މޯޓިވޭޝަނަލް ސްޕީޗާއި ޕަބްލިކް ސްޕީޗް ދިނުމުގެ ހުނަރުތަކުގެ ތަމްރީން ދެއްވާ ހުސެއިން އަފީފް (ލަކްސް އަފީފު) ވިދާޅުވެފައިވާ ގޮތުގައި އެންމެން އުންމީދުކުރާ ގޮތަށް އެހެން މީހުނަށް ވާހަކަ ނުދެއްކޭތީ ނުވަތަ ހުށަހަޅައި ނުދެވުމުން އެއީ ދުވަހަކު ވެސް ލަދުގަންނަން ޖެހޭވަރުގެ ކަމެއް ނޫނެވެ. މޮޅަށް ވާހަކަ ދެއްކުމާއި ނުދެއްކުމަކީ އެމީހެއްގެ ވިސްނުންތެރިކަމާއި ގާބިލު ކަމާމެދު ސުވާލު އުފެއްދޭ ވަރުގެ ކަމެއް ވެސް ނޫނެވެ. 

ޓޫރިޒަމް އެހެން ގްރޫޕެއްގައި އިންޑަސްޓްރީގެ އިސް ބޭފުޅަކު ވަނީ ސުވާލެއް އުފައްދަވާފަ އެވެ. އެއީ ކުރިން ޕީއެޗްޑީ ނަގައިގެން މޮޅަށް ވާހަކަ ދެއްކެވި އެތައް ބަޔަކު މިނިސްޓްރީ ހިންގެވި ނަމަވެސް ނެރެވުނީ ކޮން ނަތީޖާއެއް ތޯ އޭނާ ކުރެއްވި ސުވާލެކެވެ. 

"ރައީސް ސޯލިހު އާއި މިނިސްޓަރު ނަހުލާއަކީ ނުކިޔަވާ ބޭފުޅުންނޭ ކިޔައިގެންވެސް ވާހަކަ ދެއްކި. ޕަބްލިކް ސްޕީޗްތަކަށް ވެސް ފާޑުކި. އެކަމަކު ރައީސް ސޯލިހު ނޫންތޯ އެންމެ ރަނގަޅު ވަގުތު ބޯޑަރު ހުޅުވައި އިކޮނޮމީ ހިންގީ. ޓްރާންސްޕޯޓް މިނިސްޓަރު ނަހުލާ ނޫންތޯ ޓްރާންސްޕޯޓް މިނިސްޓްރީގެ ޑިޖިޓަލްކޮށް ފަސޭހަ ކުރަން ފިޔަވަޅު އެޅީ... މީގައި މުހިންމީ މޮޅަށް ވާހަކަ ދެއްކުން ތޯ ނޫނީ ނަތީޖާ ތޯ؟،" އެ ބޭފުޅާ ވިދާޅުވި އެވެ.