ޑިމޮކްރެޓުންގެ އިންތިހާބުގެ ނަތީޖާ އިއުލާނު ކުރުން ފަސްކޮށްފި

ދަ ޑިމޮކްރެޓްސް އެތެރޭގެ އިންތިހާބުގެ ވަގުތީ ނަތީޖާ މިރޭ އިއުލާނު ނުކުރާނެ ކަމަށް އެ ޕާޓީން ބުނެފި އެވެ. 

ޑިމޮކްރެޓިންގެ ފުރަތަމަ އިންތިހާބުގައި ޑިމޮކްރެޓްސްގެ ރައީސާއި ނައިބު ރައީސް ހިމެނޭހެން 23 މަގާމަކަށް ބޭފުޅުން އިންތިހާބު ކުރާނެ އެވެ. ހަވީރު 4:00 އަށް މާލޭގައި ވޯޓުލުން ކުރިއަށް ދިޔަ އެވެ. ރާއްޖޭގެ ގިނަ ރަށްތަކެއް ގައި ވެސް ވޯޓްލުން ކުރިއަށް ގެންގޮސްފައި ވެ އެވެ.

ނަމަވެސް މިހާތަނަށް އިންތިހާބުގެ ވަގުތީ ނަތީޖާ އިއުލާނު ކޮށްފައެވެ. ވަގުތީ ނަތީޖާ އިއުލާނު ކުރުން ފަސްވާތީ ސުވާލު ކުރުމުން އެ ޕާޓީން ބުނީ އިންތިހާބުގެ ވަގުތީ ނަތީޖާ އިއުލާނު ކުރާނީ މާދާމާ ކަމަށެވެ.

ނަމަވެސް ވަކި ވަގުތެއް ނުބުނެ އެވެ. އަދި އިތުރު ތަފްސީލެއް ވެސް ނުދެ އެވެ.

މިއީ ޕާޓީއެއްގެ އެތެރޭގެ އިންތިހާބެއްގެ ވަގުތީ ނަތީޖާ އިއުލާނު ކުރުން މިފަދަ ގޮތަކަށް ފަސްކުރި ފުރަތަމަ ފަހަރެވެ.

އިންތިހާބުގައި އެ ޕާޓީގެ ރައީސް ކަމަށް ވާދަކުރީ އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު އާއި އެ ޕާޓީގެ ވަގުތީ ޗެއާގެ މަގާމުގައި ހުންނެވި ހަސަން ލަތީފެވެ. އެންމެ ބޮޑު ވާދައެއް އޮތީ ވެސް އެ މަގާމަށެވެ.

ހަސަން ލަތީފްގެ ސަޕޯޓަރުން ގެންދަނީ އޭނާ އިންތިހާބު ކާމިޔާބު ކޮށްފައިވާ ކަމަށް ބުނެ މަރުހަބާ ކިޔަމުންނެވެ. ގިނަ ވޯޓް ފޮށިތަކުން ކުރި ހޯދީ އަމްރު ކަމަށް އޭނާގެ ސަޕޯޓަރުން ވެސް ބުނެ އެވެ.

މިއީ ޑިމޮކްރެޓްސްގެ ފުރަތަމަ އެތެރޭގެ އިންތިހާބެވެ. އެ ޕާޓީ ރަޖިސްޓްރީ ކުރީ މިދިއަ ޖުލައި މަހުގެ 12 ވަނަ ދުވަހުގަ އެވެ. ރަސްމީ ދަފުތަރު ބުނާ ގޮތުން ޑިމޮކްރެޓްސްގައި އަދި ތިބީ 3،280 މެންބަރުންނެވެ.