ޖަނާހު ގްލޯބަލް ފައުންޑޭޝަނުން ބައިނަލް އަގުވާމީ އެވޯޑެއް ދެނީ

ރާއްޖޭގެ މަޝްހޫރު ވިޔަފާރިވެރިޔާ މުހައްމަދު އަލީ ޖަނާހުގެ، ޖަނާހު ގްލޯބަލް ފައުންޑޭޝަނުން މުޅި ދުނިޔެއަށް ހުޅުވާލައިގެން، ކޮންސްޓްކަޝަން ދާއިރާގެ އެވޯޑެއް ދޭން ނިންމައި، އެކަން އިއުލާން ކޮށްފި އެވެ. 

ދުނިޔޭގެ އެންމެ ބޮޑު އެއް ޖަމިއްޔާ އިފޮޕްކާއިން ނޭޕާލްގެ ވެރިރަށް ކަތަމަންޑޫގައި ބޭއްވި 46 ވަނަ ބައްދަލުވުމުގައި ޖަނާހު ގްލޯބަލް ފައުންޑޭޝަނުން ބައިނަލްއަގުވާމީ އެވޯޑެއް ދޭން ނިންމިކަން އިއުލާނު ކުރެއްވީ މި އެވޯޑް ނިސްބަތްވެ ވަޑައިގަންނަވާ މަސީގެ ރައީސް މުހައްމަދު އަލީ ޖަނާހުގެ ދަރިކަނބަލުން ނޫރެއިން ޖަނާހެވެ. މިއީ މިގޮތަށް ދިވެއްސެއް ހިމެނޭ ޖަމިއްޔާއަކުން ދުނިޔެއަށް ހުޅުވާލައިގެން ބައިނަލްއަގުވާމީ އެވޯޑެއް ދޭން ނިންމި ފުރަތަމަ ފަހަރެވެ. 

އިމާރާތް ކުރުމުގެ ދާއިރާގެ އިމާޖިން ޔަންގް ލީޑާސްގެ ނަމުގައި ދޭ މި އެވޯޑާ ބެހޭ ގޮތުން ވާހަކަފުޅު ދައްކަވަމުން ނޫރެއިން ވިދާޅުވީ މި ޕްރޮގްރާމަކީ އޭނާގެ ބައްޕާފުޅު ފެއްޓެވި ވަރަށް މުހިންމު ޕްރޮގްރާމެއް ކަމަށާ މި ޕްރޮގްރާމުގެ މުހިންމުކަން ފާހަގަކޮށް ދެން އޮންނަ ކޮންވެންޝަނުން ފެށިގެން އައުޓްސްޓޭންޑިން އިމާޖިން ޔަންގް ލީޑާސްގެ ނަމުގައި އެވޯޑެއް ތައާރަފުކޮށް އިނާމެއްގެ ގޮތުގައި 3،000 ޑޮލަރު (ގާތްގަނޑަކަށް 46,260ރ.) ދޭން ނިންމާފައިވާ ކަމަށެވެ. 

އިފޮޕްކާގެ ކޮންވެންޝަން ދެން އޮންނާނީ 2025 ވަނަ އަހަރު އެޕްރީލް 17 އިން 11 އަށް ސިންގްޕޫރުގަ އެވެ. 

ފިލިޕީންސްގައި މައި އޮފީސް ހުންނަ މި ޖަމިއްޔާގައި ދުނިޔޭގެ ބޮޑެތި އިގްތިސޯދުތައް ކަމަށްވާ އިންޑިއާ އަދި ޖަޕާންގެ އިތުރުން ޗައިނާ ފަދަ ބޮޑެތި ބާރުތައް ވެސް ހިމެނެ އެވެ.