ވީއީސީ | ޓޫރިޒަމުގަ ރީތި އާ ކުލަތައް ޖައްސާން ބޮޑުވެގެންވާ ބަދަލެއް
ވީއީސީ ވަކި ކޮށްލުމާމެދު ޓޫރިޒަމް އިންޑަސްޓްރީ ދެކުނީ ވަރަށް ޕޮޒިޓިވް ކޮށެވެ. ޓޫރިޒަމް އިންޑަސްޓްރީގެ އިސް ފަރާތްތަކުން ދެކިވަޑައިގަންނަވާ ގޮތުގައި ޓޫރިޒަމް ހިންގާލަން ސަރުކާރުން މި އެ އެޅީ ދިގު އަދި ދުރު ވިސްނޭ ފިޔަވަޅެކެވެ.
އިގްތިސޯދާ ގުޅުންހުރި ކަންކަމުގައި ގޮތް ނިންމާ ފުރަތަމަ މަރުހަލާއަކީ ރައީސުލް ޖުމްހޫރިއްޔާ ޗެއާ ކުރައްވާ އިކޮނޮމިކް ކައުންސިލެވެ. އެ ކައުންސިލްގެ މޭޒަށް ކޮންމެ ދުވަހަކު ވެސް އެތައް ކަމެއް ޖަމާ ވެއެވެ. އެ ކަންކަމާމެދު ކެބިނެޓުގައި ހިމެނިވަޑައިގަންނަވާ ވަޒީރުން މަޝްވަރާ ކުރައްވާ ކުރިއަށްދާނެ ގޮތެއް ނިންމަނީ އޭގެ ފަހުންނެވެ. މިހާތަނަށް އިކޮނޮމިކް ކައުންސިލްގައި ކަންކަން ވަމުން ދިޔަ ގޮތުން އިގްތިސޯދާ ގުޅުންހުރި ހުރިހާ ނިންމެވުމެއް އަންނަނީ ގަނޑުކޮށެވެ. އޭގެ ނަތީޖާއަކީ މަސްހުނި ގަނޑެއް ފަދައިން ކަންކަން ނިމެމުން ދިއުމެވެ.
ނަމަވެސް ރައީސް ޑރ. މުހައްމަދު މުއިއްޒު އިއްޔެ ނިންމެވި ނިންމެވުމާއެކު ބޮޑު ބަދަލެއް އެވަނީ ފާހަގަވެފަ އެވެ. އިކޮނޮމިކް ކައުންސިލްގެ މޭޒުމަތީގައި ކުރިން އޮންނަ ޓޫރިޒަމްގެ ބައި އެ ކައުންސިލުން ނަގައި ވަކިން ކައުންސިލެއް ހަދައި ފޯކަސް މަސައްކަަތަކަށް އަނބުރާ ލެއްވެވީ އެވެ.
ވިޒިޓާ އިކޮނޮމިކް ކައުންސިލް / ވީއީސީ ވަކި ކޮށްލުމާމެދު ޓޫރިޒަމް އިންޑަސްޓްރީ ދެކުނީ ވަރަށް ޕޮޒިޓިވް ކޮށެވެ. ޓޫރިޒަމް އިންޑަސްޓްރީގެ އިސް ފަރާތްތަކުން ދެކިވަޑައިގަންނަވާ ގޮތުގައި ޓޫރިޒަމް ހިންގާލަން ސަރުކާރުން މި އެ އެޅީ ދިގު އަދި ދުރު ވިސްނޭ ފިޔަވަޅެކެވެ.
"ހަގީގަތުގައި މި ބަދަލު ގެންނަން އަޅުގަނޑުމެން ކުރިން ވެސް ސަރުކާރުގައި އެދެމުންދާތާ ލައްކަ ޒަމާން ވެއްޖެ. މިހާތަނަށް އޮންނަ ގޮތުން ހުރިހާ އިގްތިސޯދާ ގުޅުންހުރި ކަންކަމުގައި ސަރުކާރަށް ޑިސްކަސްކޮށް ރަނގަޅަށް އަވަހާ ގޮތް ނިންމަން ދަތިވޭ، އެއީ ހުރިހާ އެެއްޗެއް އެއްކޮށް އޮތުމުން، އެހެންވެ މިއީ ވަރަށް ދުރު ވިސްނޭ ނިންމުމެއްގެ ގޮތުގައި ބުނެވިދާނެ،" ރާއްޖެއަށް ރަޝިއާ އިން އެންމެ ގިނަ ޓޫރިސްޓުން ގެންނަ އެއް ކުންފުނި ކަމަށްވާ ރިސޯޓް ލައިފްގެ ވެރިޔާ މުހައްމަދު ޝާޒް ވަލީދު ވިދާޅުވި އެވެ.
ވީއީސީ ކައުންސިލް އުފެއްދި ސަބަބު ހާމަ ކުރައްވަމުން ރައީސް އޮފީހުގެ އަންޑަ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އިއްޔެ ވިދާޅުވި ގޮތުގައި ޓޫރިޒަމަކީ ރާއްޖޭގެ އިގްތިސޯދު އެންމެ ބޮޑަށް ބަރޯސާވެފައިވާ ދާއިރާ ކަމަށްވާއިރު އެ ދާއިރާ ކުރިއެރުވުމަކީ ރައީސް މުއިއްޒުގެ މުހިންމު ލަނޑުލަނޑި އެވެ.
"ޓޫރިޒަމަށް ހާއްސަ ފޯކަސްއެއް ކުރަން މި ކައުންސިލް އުފެއްދީ. މި ކައުންސިލުގެ މެންޑޭޓްގައި ހިމެނޭ އަނެއް ކަމަކީ ފަތުރުވެރި ކަމުގެ ދާއިރާ ސިންދަފާތުކޮށް ޑައިވާސިފައި ކުރުމަށްޓަކާ ކުރަންޖެހޭ ކަންކަން ކުރުން،" ފިރުޒުލް ވިދާޅުވި އެވެ.
ޓޫރިޒަމް ޑައިވާސިފައި ކުރަން މިހާތަނަށް ހުސްވާހަކަ
ވިއީސީ ކައުންސިލް އުފެއްދުމާއެކު އިކޮނޮމިކް ކައުންސިލްގެ ތެރޭން ސީދާ ޓޫރިޒަމަށް ވިސުން ބަދަލު ކުރަން ފުރުސަތު ފަހިވާނެ އެވެ.
ކައުންސިލްގެ މެންޓޭޓްގެ ތެރޭގައި ހިމެނޭ އެންމެ މުހިންމު ނިންމެވުމަކީ ޓޫރިޒަމް ޑައިވާސިފައި ކުރުމެވެ. ނިމިދިޔަ ސަރުކާރުގައި ވެސް ޑައިވާސިފައި ނުވަތަ ޓޫރިޒަމް "ސިންތިފާތު" ކުރުމެއްގެ ވާހަކަ ދެއްކި އެވެ. އެކަމަކު އެމަކަށް ހަރުދަނާ ޑިސިޝަނެއް ނަގައިގެން ވަކި ޓާގެޓެއް ހެދިފައެއް ނެތެވެ. އޭގެ ސަބަބުން ފަސް އަހަރު ނިމިގެން ދިޔައީ ޓޫރިޒަމް މިނިސްޓަރަށް ހުންނެވި މިނިސްޓަރާއި އެމްއެމްޕީއާރްސީ ހިންގަވަން ހުންނެވި ވެރިޔާ ނޫން ސަރުކާރުގެ އެއްވެސް ބޭފުޅަކު އެ ވާހަކަ ދައްކާތީ ނުފެނި އެވެ.
މުޅި ސަރުކާރުގެ ލެވެލްގައި އެ މަސައްކަތެއް ނުކުރެވުނެވެ. އޭގެ ނަތީޖާއަކީ ފަސް އަހަރުގެ ކުރީގައި އޮތް ޓޫރިޒަމެކޭ މިދިއަ ފަސް އަހަރަކޭ ތަފާތެއް ނެތެވެ. ޓޫރިޒަމްގެ އާ ރަހައެއް އާ މާކެޓެއް އިގްތިސޯދަކުން ނުފެނެ އެވެ.
ރާއްޖެ މިހާރު އޮތީ ހަމައެކަނި ޗުއްޓީ ހޭދަ ކޮށްލަން އަންނަ މަންޒިލެއްގެ ގޮތުގަ އެވެ. ނަމަވެސް ރައީސްގެ މުއިއްޒުގެ ވިސްނުންފުޅު ހުރީ ޓޫރިޒަމަށް އިތުރު ރަހަތަކެއް ގެނެސްދޭށެވެ. ވިޒިޓާ އިކޮނޮމިކް ކައުންސިލް އުފެއްދުމުގެ މަގުސަދަކީ ސިއްހަތާއި ތައުލީމާއި ދަތުރުފަތުރުގެ ޓޫރިޒަމް ފަދަ އެކި ދާއިރާތަކުން ޓޫރިޒަމް ކުރިއެރުވުމެވެ.
މި ނިންމުމަށް މުޅި ޓޫރިޒަމް އިންޑަސްޓްރީން އޮތީ ޕޮޒިޓިވް ބަދަލެއްގެ ގޮތުގައި ދެކެގެނެވެ.
ރާއްޖޭގެ އެންމެ ދުވަސްވީ އެއް ޓްރެވަލް ކުންފުނި ކަމަށްވާ އިނަ މޯލްޑިވްސްގެ ވެރިޔާ މުހައްމަދު ފިރާގު ވިދާޅުވި ގޮތުގައި ސަރުކާރުގެ އެ ނިންމެވުމާއެކު ފޯކަސް ކޮށްގެން މަސައްކަތް ކުރަން ފުރުސަތު ފަހި ވެގެންދާނެ އެވެ. އަދި މިއީ ވަރަށް ހެޔޮ ބަދަލެއްގެ ގޮތުގައި ވެސް އޭނާ ސިފަ ކުރެއްވި އެވެ.
ސަރުކާރުގެ މި ނިންމެވުމާއެކު އިތުރަށް ރަނގަޅުކޮށްލަން ޖެހޭ ކަންކަތައްތަކެއް ވެސް އިންޑަސްޓްރީގެ ބައެއް ފަރާތްތައް ފާހަގަ ކުރެ އެވެ. އެއީ ޕްރައިވެޓް ސެކްޓާވެސް ބައިވެރި ކޮށްގެން ސަރުކާރުގެ ނިންމުންތަށް ނިންމޭނެ މެކޭނިޒަމެއް ގާއިމް ކުރުމެވެ. އެކި އިންޑަސްޓްރީތައް ސަރުކާރާއެކު ގުޅިގެން މަސައްކަތް ކުރެވޭ ގޮތަށް ބައިވެރި ކުރުން މުހިންމެވެ.
ދިގު މުއްދަތުގެ މާސްޓަ ޕްލޭނަކަށް މަގުފަހިވާނެ
ޓޫރިޒަމް އިންޑަސްޓްރީގެ ސީނިއާ ބޭފުޅަކު ވިދާޅުވި ގޮތުގައި މިހާރު އިކޮނޮމިކް ކައުންސިލްގައި މަސައްކަތްތަށް އޮންނަ ގޮތުން ހަގީގަތުގައި އިގްތިސޯދީ ކަންކަމުގައި ހާއްސަކޮށް ޓޫރިޒަމަށް ފޯކަސް ކުރަން ދަތިވެ އެވެ. ނަމަވެސް ރައީސް މުއިއްޒުގެ ބެއްލެވުމުގެ ދަށުން އުފެއްދި ވިޒިޓާސް ކައުންސިލްގެ ސަބަބުން ޓޫރިޒަމް ޕްރޮމޯޝަނާއި ޑައިވާސިފައި ކުރުން ފަދަ ކަންކަމަށް އިތުރު ފަސޭހައެއް ލިބިގެންދާނެ އެވެ.
ޝާޒް ވަލީދު ވިދާޅުވި ގޮތުގައި ރާއްޖޭގައި ދުނިޔޭގެ އެހެން ގައުމުތަކުގައި އޮންނަ ފަދަ މަންޒިލްތަކެއް އުފެދެން ޖެހެ އެވެ. މި ކައުންސިލްގެ ސަބަބުން އެ ބަދަލު އަންނަން މަގު ފަހި ވެގެންދާނެ އެވެ. އަދި އެއާއެކު ޓޫރިޒަމަށް މިހާރު ފަސް އަހަރަށް ހަދާ މާސްޓަ ޕްލޭންއަކީ ގައުމީ ފެންވަރުގެ އެއްޗެއްގެ ގޮތުގައި ހެދުމަށް ބާރު އެޅިގެންދާނެ އެވެ.
"ތައިލެންޑަށް ބަލާނަަމަ ބެންކޮކް އިންޑޮނޭޝިއާއަށް ބަލާނަމަ ބާލީ، މިއީ އެ ގައުމުގެ ތެރޭގައި ހުރި އިތުރު މަންޒިލްތައް. ރާއްޖޭގައި ވެސް ހާއްސަ ސިފަތަކެއް ހުރި ވަކިވަކި މަންޒިލްތަށް އެބަހުރި. އެހެންވެ އަޅުގަނޑަށް ވިސްނޭ ގޮތުގައި މި ބަދަލުގެ ސަބަބުން ސަރުކާރަށް ފަސޭހަވާނެ ވަކި މަންޒިލް ތަކެއް އުފައްދަން މަސައްކަތް ކުރަން. ވަކި ކެޓަގަރީތަކެއް އުފެއްދުމަށް،" ވަލީދު ވިދާޅުވި އެވެ.
"މިހާރު ކޮންމެ ސަރުކާރަކުން ޓޫރިޒަމް މާސްޓަ ޕްލޭން މި ހަދަނީ ފަސް އަހަރަށް. އެ ސަރުކާރުން ބޭނުންވާ ގޮތަކަށް އެކަމަކު މި ބަދަލުގެ ސަބަބުން 20 އަހަރު ދުވަހަށް މާސްޓަ ޕްލޭނެއް ހަދަން އިންޑަސްޓްރިއާއެކު މަސައްކަތް ކުރަން ސަރުކާރަށް ފަސޭހަވާނެ ކަމަށް ވިސްނެނީ."
ރައީސް މުއިއްޒު ވެރިކަމާ ހަވާލުވެ ގެނައި ކުޑަކުޑަ މި ބަދަލަކީ ބޮޑު ބަދަލަކެވެ. އަދި މިއީ މިވަގުތަށް ރާއްޖެއަށް މުހިންމު ނިންމެވުމެކެވެ. މިހާތަނަށް ޓޫރިޒަމް ޑަައިވާސިފައި ކުރުމަކީ ހަމައެކަނި ކަރުދާހުގައި އޮތް ކަމެއްގެ ބަދަލުގައި މުޅި ސަރުކާރުން އެކުގައި މިކަން ކުރަން ބާރު އަޅަން މަގު ފަހި ވެގެންދާނެ ވެސް ބަދަލެކެވެ.
ކޮމެންޓް
ސާބަހޭ މުއިއްޒު. ކުރިޔަށް ބާރަށް
Republic of Maldives