މަޖިލީސް ކުރިއަށް ގެންދަން ބަންޑާރަ ނައިބުގެ ލަފާ ހޯދަނީ

ރައްޔިތުންގެ މަޖިލީހަށް މިހާރު ދިމާވެފައި އޮތް ހާލަތުގެ ތެރެއިން ޖަލްސާތައް ކުރިއަށް ގެންދެވޭނެ ގޮތަކާމެދު ބަންޑާރަ ނައިބްގެ ލަފަޔަކަށް އެދެން އާންމު ކޮމެޓީން ނިންމައިފި އެވެ.

މަޖިލީހުގައި މިހާރު އޮތް ހާލަތު މެދުވެރިވެފައި ވަނީ މަޖިލީހުގެ ރައީސް މުހައްމަދު ނަޝީދު ވަކިކުރަން ހުށަހަޅާފައިވާ ގަރާރު ރިޔާސަތުން ބޭރުކޮށްލުމުންނެވެ. ރިޔާސަތުގައި އިންނެވީ ވިލުފުށި ދާއިރާގެ މެމްބަރު ހަސަން އަފީފެވެ. އޭނާ ރިޔާސަތާ ހަވާލުވެވަޑައިގަތީ މަޖިލީހުގެ ރައީސް އީވާ އަބްދުﷲ ސަލާން ފޮނުއްވުމުންނެވެ.

އަފީފް ވަނީ ނަޝީދު ވަކި ކުރަން ހުށަހަޅާފައިވާ ގަރާރަކީ މަޖިލީސް ގަވާއިދާ ހިލާފު ގަރާރެއް ކަމަށް ނިންމަވާފަ އެވެ. އެ ޖަލްސާއަށް ފަހު މިއަދު ދެވަނަ ފަހަރު ބޭއްވި ޖަލްސާގެ ރިޔާސަތާ ހަވާލުވެ ވަޑައިގެން އީވާ ވިދާޅުވެފައި ވަނީ ބޭރު ކޮށްލާފައިވާ ގަރާރެއްގެ މައްސަލަ ކުރިއަށް ނުގެންދެ ވޭނެ ކަމަށެވެ.

މި މައްސަލައާ ގުޅިގެން މިއަދު ވަނީ އާންމު ކޮމެޓީ ބައްދަލުވުމެއް ބާއްވާފަ އެވެ. މި ބައްދަލުވުމުގައި އަލިފުށި ދާއިރާގެ މެމްބަރު މުހައްމަދު ރަޝީދު (ބިގޭ) ހުށަހެޅުއްވީ އެ ކޮމެޓީއަށް ލިބޭ ބާރުގެ ދަށުން މި މައްސަލައިގައި ދެން އަމަލު ކުރާނެ ގޮތުގެ ލަފަޔެއް ހޯދަން ބަންޑާރަ ނައިބަށް ދެންނެވުމަށެވެ. ސީދާ ކޮމެޓީން އެ ލަފަޔަށް ނޭހޭނެތީ އޭނާ ހުށަހެޅުއްވީ އަމީންއާންމުގެ އެހީތެރިކަމާއެކު އެ ލަފާ ހޯދުމަށެވެ.

މެމްބަރުގެ އެ ހުށަހެޅުމަށް ކޮމެޓީއަށް ވަޑައިގެން ތިއްބެވި ދަ ޑިމޮކްރެޓްސްގެ މެމްބަރުން ވަނީ ދެކޮޅު ހައްދަވާފަ އެވެ. އެގޮތުން، ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވެފައި ވަނީ މަޖިލީހުގެ ތަޅުމުގައި ހިނގާ އެއްވެސް ކަމަކަށް ގޮތް ކިޔާ އަދި ބަންޑާރަ ނައިބްގެ ލަފާ ހޯދުމަކީ އެ ކޮމެޓީއަށް ލިބިގެންވާ ބާރެއް ނޫން ކަމަށެވެ. 

ނަމަވެސް، ކޮމެޓީއަށް ހާޒިރުވެ ތިބި ހަތް މެމްބަރުންގެ އަޣްލަބިއްޔަތުން ވަނީ ބިގޭގެ ހުށަހެޅުން ފާސްކޮށްފަ އެވެ.

އީވާ އަދި އަފީފް އަމަލު ކުރެއްވި ގޮތުން މަޖިލީހުގެ މެމްބަރުންގެ އިމްތިޔާޒަށް އަރައިގެންފައިވާ ކަމަށް މިއަދު ބޭއްވި އިމްތިޔާޒާއި ސުލޫކް ކޮމެޓީން ވެސް ވަނީ ފާސްކޮށްފަ އެވެ.