ދިވެހީންގެ ކުޑަ އެހީއެއް؛ ޣައްޒާގެ މި ކުދީންނަށް ބޮޑު ހިނިތުންވުމެއް

ފަލަސްތީނުގެ ޣައްޒާ ގައި ވަޒަނެއް ނެތް ޔަހޫދީން ހިންގާ ލާއިންސާނީ ޖަރީމާތަކާއި ގުޅިގެން އެކި ޒަހަމުތައް ލިބި ހޮސްޕިޓަލްތަކުގައި ފަރުވާ ހޯދަމުންދާ އެތައް ސަތޭކަ ކުދީންނަކަށް ކުޅޭ ސާމާނު ހަދިޔާކޮށް 200 އާއިލާ އަކަށް ދިވެހީންގެ ނަމުގައި އެހީތެރިކަން ފޯރުކޮށްދީފި އެވެ.

ދިވެހީންގެ ފަރާތުން ފަލަސްތީނުގެ ރައްޔިތުންނަށް ހަދިޔާ ކުރާ ފައިސާ އިން އެހީތެރިކަން ފޯރުކޮށްދޭ އިންޓަނޭޝަނަލް އެއިޑް ކެމްޕޭން (އައިއޭސީ) އިން ބުނި ގޮތުގައި އެކި ކަހަލަ ޒަހަމުތައް ލިބިފައިވާ ކުޑަކުދީންގެ ކައިރިއަށް ޒިޔާރަތްކޮށް އެ ކުދީންނަށް އުފާވެރި ވަގުތުކޮޅެއް ހޯދާ ދިނުމަށް އެ ކެމްޕޭނުން ވަނީ މަސައްކަތް ކޮށްފައެވެ.

އެ ގޮތުން އަގްސާ ހޮސްޕިޓަލް ގައި އެޑްމިޓްކޮށްފައިވާ 700 ކުއްޖަކަށް ޒިޔާރަތްކޮށް ކުޅޭ ސާމާނު ބަހާފައިވެއެވެ. 

"މިވަގުތަކީ އެކި ގޮތްގޮތުން އެ ކުދީންނާއި ވާހަކަ ދައްކާލާ ކުޅެ ސަމާސާ ކޮށްލަން ޖެހޭ ވަގުތު ކަމުގައި އަޅުގަނޑުމެން ދެކެން،" އައިއޭސީގެ އޮފިޝަލަކު ވިދާޅުވި އެވެ.

އެ ކުދީންނަށް ދިވެހީންގެ ފަރާތުން މިކުޑަކުޑަ އެހީ ހަދިޔާ ކުރުމުން ކޮންމެ ކުއްޖަކު ވެސް އުފަލާއެކު ޝުކުރުއަދާކޮށްފައެވެ.

އޭއައިސީން ބުނި ގޮތުގައި ދިވެހީންގެ ފަރާތުން ލިބުނު އެހީން މިހާތަނަށް 200 އާއިލާ އަކަށް ނަގުދު ފައިސާ ބެހުމުގެ މަސައްކަތް ވެސް ދަނީ ކުރަމުންނެވެ. އެ ގޮތުން ކޮންމެ އާއިލާ އަކަށް 500 ޑޮލަރު ފޯރުކޮށްދޭނެ އެވެ.

ފައިސާ ބަހާފައި ވަނީ ދޭރް ބަލަހް ސަރަހައްދުގައި ދިރިއުޅޭ އާއިލާތަކަށެވެ. އެއީ އެ ސަރަހައްދުތަކުގައި ފިހާރަތަކާއި ބައެއް މާރުކޭޓްތައް ހުރުމުން އެ ފައިސާގެ ބޭނުންކޮށް އެ ރައްޔިތުންނަށް ކޮންމެވެސް ތަސައްލީއެއް ލިބުމުގެ އުންމީދުގައި ކަމަށް ވެސް ބުންޏެވެ.

އައިއޭސީ އިން ހިންގާ ގާޒާ އެމަޖެންސީ ރިލީފް ފަންޑަށް ފައިސާ ހޯދުމަށް ކުރިއަށް ގެންދާ ހަރަކާތަށް 23،987،108 ރުފިޔާ ވަނީ ލިބިފައެވެ. އަދި 13،023 ޑޮލަރު ލިބިފައިވާ ކަމަށް ވެސް ބުންޏެވެ.

ފަލަސްތީނުގެ ދިފާއުގައި މުޅި ދުނިޔޭ ގައި ވެސް ގަދަ އަޑަކީ ދިވެހީންގެ އަޑެވެ. މިދިޔަ ސާޅީހަކަށް އަހަރު ދިވެހީން ގެންދިޔައީ ބައިނަލްއަގްވާމީ ދުނިޔެއާ ރާއްޖޭގައި އެ އަޑު އުފުލަމުންނެވެ. ދިވެހީންނަށް ވެވުނު މިންވަރަކުން އެހީތެރިކަން ފޯރުކޮށް ދެމުން ދިޔަ އެވެ. ދިވެހީންގެ ހިތްތަކުގައި ފަަލަސްތީނަށް އޮތީ ވަރަށް ހާއްސަ ލޯތްބަކާއި ގަދަރެކެވެ. 

ރާއްޖޭގެ އަމިއްލަ ޖަމިއްޔާއެއް ކަމަށްވާ "ޚިދުމަތް" ޖަމިއްޔާ އިން ވެސް މި ފަހުން ވަނީ ޣައްޒާގެ ރައްޔިތުންނަށް އެހީތެރިވެ ދީފައެވެ. އެ ޖަމިއްޔާއިން ބުނީ ފަލަސްތީނަށް އެހީވާން އެ މީހުން ހުޅުވާލާފައިވާ ފަންޑަށް ލިބުނު ފައިސާގެ ތެރެއިން އެ ގައުމުގެ 120 އާއިލާއަކަށް 200 ޑޮލަރުގެ މަގުން ފައިސާ ބަހާފައިވާ ކަމަށެވެ.