އިންތިހާބީ ރައީސް މުއިއްޒު ޔޫއޭއީއަށް ވަޑައިގެންފި
މި ދަތުރުފުޅު ރައީސް މުއިއްޒު ފެއްޓެވި އިރު މިދިޔަ މަހުގެ 30 ވަނަ ދުވަހު ނުރަސްމީ ދަތުރުފުޅެއްގައި ސިންގަޕޫރަށް ވެސް ވަޑައިގެންނެވި އެވެ. ސިންގަޕޫރުގެ ދަތުރުފުޅު ނިންމަވާލެއްވެވީ މިދިޔަ ހޮނިހިރު ދުވަހުގެ ރޭ އެވެ.
އިންތިހާބީ ރައީސް / ރައީސް ޑރ. މުހައްމަދު މުއިއްޒު ނުރަސްމީ ދަތުރުފުޅެއްގައި ޔުނައިޓެޑް އަރަބް އެމިރޭޓްސް - ޔޫއޭއީއަށް މިއަދު ފުރާ ވަޑައިގެންފި އެވެ.
އިންތިހާބީ ރައީސްގެ އޮފީހުގެ ތަރުޖަމާން މުހައްމަދު ފިރުޒުލް މިއަދު "މި" ނޫހަށް ވިދާޅުވީ ރައީސް މުއިއްޒުގެ ދަތުރުފުޅުގައި ޔޫއޭއީގެ އަބޫދާބީއަށް ވަޑައިގެންފައިވާ ކަމަށެވެ. އަދި އެ މަނިކުފާނުގެ ޔޫއޭއީ ދަތުރުފުޅުގައި މެހުމާންދާރީ އަދާ ކުރުމުގެ ގޮތުން ހުރިހާ ހަރަދެއް ހަމަޖައްސައި ދީފައިވަނީ ވެސް އެ ގައުމުން ކަމަށެވެ.
ރައީސް މުއިއްޒު މިއަދު ޔޫއޭއީގެ ވެރިރަށް އަބޫދާބީއަށް ވަޑައިގެންނެވި ނަމަވެސް އެއީ ކިތައް ދުވަހުގެ ދަތުރުފުޅެއްކަން ހާމަކޮށްފައެއް ނުވެއެވެ. އަދި އަރިހުގައި ވަޑައިގެންނެވި ޑެލިގޭޝަންގެ މައުލޫމާތެއް ވެސް ނެތެވެ.
މި ދަތުރުފުޅު ރައީސް މުއިއްޒު ފެއްޓެވި އިރު މިދިޔަ މަހުގެ 30 ވަނަ ދުވަހު ނުރަސްމީ ދަތުރުފުޅެއްގައި ސިންގަޕޫރަށް ވެސް ވަޑައިގެންނެވި އެވެ. އާއިލާ އާއި ޕާޓީ ލައިނުން ޕީޕީއެމާއި ޕީއެންސީގެ ބައެއް ލީޑަރުން ބައިވެރިވެ ވަޑައިގެންނެވި ސިންގަޕޫރުގެ ދަތުރުފުޅު ނިންމަވާލެއްވެވީ މިދިޔަ ހޮނިހިރު ދުވަހުގެ ރޭ އެވެ.
ރައީސް މުއިއްޒު ރައީސުލްޖުމްހޫރިއްޔާ ކަމުގެ ހުވާ ކުރައްވާ އެ މަނިކުފާނުގެ ރިޔާސީ ދައުރު ފައްޓަވާނީ މި މަހުގެ 17 ވަނަ ދުވަހުގެ ހަވީރު އެވެ. ރައީސް މުއިއްޒާއި ނައިބު ރައީސް ހުވާ ކުރެއްވުމަށް ރައްޔިތުންގެ މަޖިލީހުން ބާއްވާ ދަރުބާރު ޖަލްސާ ބާއްވަނީ މާލޭގެ ޖުމްހޫރީ މައިދާނުގަ އެވެ.
އެ މަނިކުފާނަކީ ރާއްޖޭގެ ދެވަނަ ޖުމްހޫރިއްޔާގެ ހަތް ވަނަ ރައީސެވެ. އަދި ދެ ޖުމްހޫރިއްޔާގެ އަށް ވަނަ ރައީސެވެ.
ކޮމެންޓް
Republic of Maldives