ޖާވާކަރަ | ޅަވިޔަންޏަށް ދެ ރަށުގެ އާ ރިސޯޓެއް

ޅަވިޔަނީގެ ޓޫރިޒަމްގައި އެންމެ ގަދަ ނަމަކީ ކްރައުން އެންޑް ޗަމްޕާ ރިސޯޓްސް (ސީސީއާރް) އެވެ. އެ އަތޮޅުގެ ހުރިހާ ޓޫރިސްޓު ރަށެއްހެން ހިންގަނީ އެ ކުންފުނިންނެވެ. މި ރިސޯޓްތަކުގެ ބޮޅަށް މިފަހަރު އިތުރުވީ އަލަށް ހިއްކައިގެން ހެދި ޖަވާކަރަ އައިލެންޑެވެ. 

މަޝްހޫރު ވިޔަފާރި އާއިލާ ޗަމްޕާ ބްރަދާސް އިން ތަރައްގީ ކުރި މަތީފަންތީގެ މި ރިސޯޓް، ޖާވާކަރަ، އެ ކުންފުނިން ބްރޭންޑް ކޮށްފައިވަނީ ދެ ރަށުގައި ހިންގާ އެއް ރިސޯޓުގެ ގޮތުގަ އެވެ. 

މިއީ އެޑްވެންޗަރަސް ޓޫރިސްޓުންނަށް ހާއްސަ ގިނަ ހިދުމަތްތަކެއް ވެސް ހިމެނޭހެން ތަރައްގީ ކޮށްފައިވާ ރަށެވެ. މި ރިސޯޓަކީ ކުޑަދޫ މޯލްޑިވްސް ޕްރައިވެޓް އައިލެންޑް، ހުރަވަޅި މޯލްޑިވްސް، އަދި ކަގީ މޯލްޑިވްސް ރިސޯޓް އެންޑް ސްޕާ ހިމެނޭ ޗަމްޕާގެ ލަގްޒަރީ ރިސޯޓް ކަލެކްޝަނަށް އިތުރުވި އާ މެންބަރެވެ. 

މި ރަށުގައި ރާއްޖޭގެ ޓޫރިޒަމްގެ މައިގަނޑު ތީމް ކަމަށްވާ ވަން އައިލެންޑް ވަން ރިސޯޓް ކޮންސެޕްޓުގެ 290 ވިލާ ހުންނާނެ އެވެ. ރިސޯޓަށް ދާ ޓޫރިސްޓުންނަށް ލިބޭނެ އަނެއް އެކްސްޕީރިއަންސްއަކީ ޗަމްޕާ ކުންފުނިން ޅ. މަޑިވަރުގައި ތަރައްގީ ކޮށްފައިވާ އެއާޕޯޓަށް ވީއައިއޭއިން ސީޕްލޭން އެކްސްޕީރިއަންސްއަކާއެކު ދެވޭނެ މަގު އޮތުމެވެ. މި ދަތުރުގެ ދިގު މިނަކީ ގާތްގަނޑަކަށް 35 މިނެޓެވެ.

ޖަވާކަރަ އައިލެންޑުގެ ހުރިހާ ތަޖުރިބާތަކެއް ވެސް ފަރުމާ ކޮށްފައި ވަނީ އާއިލާއާ ރައްޓެހިން އެއްކޮށް ގޮސް ހިތްފަސޭހަ އުފާވެރި މަޖާ ތަޖުރިބާއެއް ކޮށްލެވޭނެ ގޮތަށެވެ. މި ރިސޯޓުގައި މޫދު ކުޅިވަރުތައް ލިބެން ހުރެ އެވެ. އަދި ދެ އިންފިނިޓީ ޕޫލްއާއެކު ދެ ރެސްޓޯރެންޓް ހުރެ އެވެ. 

މި ރިސޯޓް ރަށް ފަރުމާ ކޮށްފައި ވަނީ 700 މީޓަރުގެ ބްރިޖަކުން ރިސޯޓުގެ ކައިރީގައި ހަދާފައިވާ ކުޑަ ދެ ރަށް ކަމަށްވާ "މާބިން" އަދި "ދެރުއް" ގުޅާލާ ގޮތަށެވެ. މި ރަށުގައި ގޮލްފް ކުޅޭނެ ސަރަހައްދެއް ވެސް ހަދާފައިވެ އެވެ. މީގެ އިތުރުން ސްޕާ އާއި ރެސްޓޯރެންޓްތަކާއި އެ ނޫން ވެސް ގިނަ ވަސީލަތްތަކެއް ހުރެ އެވެ.