އިޒްރޭލަށް ދިވެހީންގެ އިހުތިޖާޖު ފެނިއްޖެ، އެންގީ ރާއްޖެ ނުދާން

ހައްދުފަހަނައަޅާފައިވާ ޒަޔަނިސްޓު ޔަގީނުން، ފަލަސްތީނުގެ ވަޒަންވެރީންނާއި ދެކޮޅަށް ހިންގާ ޓެރަރިސްޓް އަމަލުތަކާއި ދެކޮޅަށް ތެދުގެ ފަލަސްތީނުގެ ނަސްރަށް އެދި ދިވެހީން ކުރާ މަސައްކަތް ފެށި އިޒްރޭލުގެ މީހުން ރާއްޖެ ނުދާން އެ މީހުންގެ ފޮރިން މިނިސްޓްރީން އަންގައިފި އެވެ.

އިޒްލޭލުގެ ޔަހޫދީ ސިފައިން ފަލަސްތީނު ރައްޔިތުންނަށް ދެމުންދާ ހަމަލާތަކާ ހިންގާ ލާއިންސާނީ ޖަރީމާތަކާ ގުޅިގެން އިޒްރޭލު މީހުން ރާއްޖެ އައުން ހުއްޓުވުމަށް ގޮވާލާ ގޮވާލުމުގެ އަޑުވަނީ ރާއްޖޭގައި ވަނީ ގަދަވެފަ އެވެ. އެގޮތުން މިކަމުގައި ރާއްޖޭގެ ބައެއް ދީނީ އިލްމުވެރިންވެސް ބައިވެރިވެ އެކަމަށް ގޮވާލާ ގޮވާލުމުގެ މަޑު ވަނީ ގަދަކޮށްފައިވާއިރު އެފަދަ ބަހުސެއް ކުރުމަށް މަޖިލީހަށް ވަނީ ގަރާރެއް ވެސް ވައްދާފަ އެވެ.

އަދި ފަލަސްތީނުގެ ރައްޔިތުންނާއެކު ދިވެހީން ތިބިކަން ހާމަ ކުރުމަށް ބޮޑެތި އެއްވުންތަކާއި ރެލީތައް ވަނީ ބާއްވާފައެވެ. ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީވުމަށް ހިންގި ހަރަކާތަށް ދިވެހީން ވަނީ އެތައް މިލިއަން ރުފިޔާ އެއް ހަދިޔާ ކޮށްފައެވެ.

ދިވެހީން ތިބީ ފަލަސްތީނާ އެކުކަން ފާހަގަކޮށް ހަގީގީ ވަޒަނެއް ނެތް އިޒްރޭލުން އެ މީހުންގެ ރައްޔިތުންނަށް އެންގީ ރާއްޖެ ނުދިނުމަށެވެ. އިޒްރޭލާ ދެކޮޅު ހަރަކާތްތައް ރާއްޖޭ ގައި ބޮޑު ކަމުން މިއީ ރާއްޖެއަަށް ދަތުރު ކުރަން އެ މީހުންނަށް ރައްކާތެރި ދުވަސްވަރެއް ނޫން ކަމަަށެވެ.

މިދިޔަ ހަތަރު އަހަރު ރާއްޖެއަށް އިޒްރޭލުން ބައި ލައްކައަށްވުރެ ގިނަ ޓޫރިސްޓުން އައިސްފައިވާ ކަމަށް ސަރުކާރުގެ ރަސްމީ ހިސާބުތަކުން ދައްކަ އެވެ.

"މި" ނޫހުން އެދިގެން ސަރުކާރުން ދީފައިވާ ޓޫރިސްޓު އެރައިވަލްސްގެ އެ ހިސާބުތައް ދައްކާ ގޮތުގައި މިދިޔަ އަހަރުގެ މެދެއްހާ ހިސާބަށް ބަލާނަމަ އިޒްރޭލުން 15,748 މީހުން ވަނީ ރާއްޖެ އައިސްފަ އެވެ. އަހަރުން އަހަރަށް ބަލާއިރު މި އަދަދު ބޮޑު ތަނުން އިތުރުވަމުން ގޮސްފައިވާކަން ފާހަގަ ކުރެވެ އެވެ. 

މިދިޔަ ހަތަރު އަހަރު ދުވަހަށް ބަލާއިރު އަހަރުން އަހަރަށް އިޒްރޭލުން އަންނަ ޓޫރިސްޓުންގެ އަދަދު އިތުރު ވަމުން ގޮސްފައި ވާތީ އަދި ނަމްބަރު އިތުރުވުމުގެ ރޭޓް ހުރި ގޮތުން މިހާރު، މި އަހަރުގެ މިހާތަނަށް 18،000 ޓޫރިސްޓުން އިޒުރޭލުން ރާއްޖެ އައިސް ވާނެ ކަމަށް އަންދާޒާއިން ދައްކަ އެވެ.