ދިއްދޫ ބަނދަރާއި ޖެޓީގެ ބޮޑު ބައި ނިންމައިފި

ހއ. ދިއްދޫ ބަނދަރު ތަރައްގީ ކުރުމާއި ޖެޓީ ހެދުމުގެ މަސައްކަތުގެ އަޕްޑޭޓް އެއް އެމްޓީސީސީން ދީފި އެވެ.

އެމްޓީސީސީން ބުނި އެ ރަށުގެ ބަންދަރު ތަރައްގީ ކުރުމާއި ޖެޓީ ހެދުމުގެ މަޝްރޫއުގެ މަސައްކަތުގެ 80 ޕަސެންޓް ފުރިހަމަކޮށްފައިވާ ކަމަށެވެ. އަދި މަސައްކަތަށް ބޭނުންވާ ކޮންކްރީޓް ގަލުގެ ޝިޕްމެންޓް މިހާރު ސައިޓަށް ގެންގޮސްފައިވާ ކަމަށެވެ. 

މީގެ އިތުރުން ހާބަރުގެ ބޭސިން ފުންކުރުމުގެ މަސައްކަތުގެ 98 ޕަސެންޓް ވެސް ވަނީ ނިންމާފަ އެވެ. ސައިޓުގައި މިހާރު ކުރިއަށް ދަނީ ބޭރުތޮއްޓާއި އެއްގަމު ތޮށި ލުމާއި ކޮންކްރީޓް ބްރިޖްގެ މަސައްކަތެވެ. 

މި މަޝްރޫއުގެ ދަށުން: 78،000 ކިއުބިކް މީޓަރުގެ ސަރަހައްދެއްގައި ބަނދަރު ފުންކުރުމާއި، 58 މީޓަރުގެ ސަރަހައްދެއްގައި ގްރޮއިންސް ޖެހުމާއި، 81 މީޓަރުގެ ސަރަހައްދެއްގައި ޗެނަލްގެ ބޭރުތޮށި ލުމާއި، 49 މީޓަރުގެ ސަރަހައްދެއްގައި ބޭރުތޮށި ލުމާއި، 768 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 898 މީޓަރުގެ ސަރަހައްދެއްގައި އެއްގަމުތޮށި ލުމާއި، ރޭމްޕެއް ހެދުމާއި، 9،270 އަކަ މީޓަރުގެ ސަރަހައްދެއްގައި ހާބަރ ޕޭވްމަންޓް ހެދުމާއި، ނެރު ބައްތި އާއި ބަނދަރު ބައްތި ހަރުކުރުމުގެ މަސައްކަތް ހިމެނެއެވެ.

މި މަޝްރޫއަކީ 88.3 މިލިއަން ރުފިޔާގެ މަޝްރޫއެކެވެ.