ރާއްޖޭގައި ލެޕްރަސީ ނެތް ކަމުގެ ޝަރުތު ފުރިހަމަކޮށްފި

ރާއްޖެ އަކީ ލެޕްރަސީ -- ޖުޒާމް ބަލި -- ނެތް ގައުމެއްގެ ގޮތުގައި ކަނޑައެޅުމަށް ބޭނުންވާ ޝަރުތު ހެލްތު މިނިސްޓްރީން ފުރިހަމަކޮށްފި އެވެ.

ރާއްޖޭން ބޮޑެތި ބަލިތައް ނައްތާލުމަށް ސަރުކާރުން ކުރަމުންދާ މަސައްކަތުގެ ތެރެއިން "ޒީރޯ ލެޕްރަސީ ފްރޭމްވޯކް" އެއްގެ މަސައްކަތް ދިޔައީ ކުރަމުންނެވެ. އެ ބަލި ނެތް ކަމަށް ނިންމޭނީ މަދުވެގެން 100 ރަށުގައި ބަލި ނެތްކަން ކަށަވަރު ކޮށްގެންނެވެ.

ހެލްތު މިނިސްޓްރީން ކުރި މަސައްކަތުން ރާއްޖޭގެ 178 ރަށުގައި ލެޕްރަސީ ނެތް ކަން ވަނީ ކަށަވަރުކޮށްފަ އެވެ. އެޔާއެކު ޒީރޯ ލެޕްރަސީ ފްރޭމްވޯކްގައި ހިމަނާފައިވާ ގިނަ ކަންކަން ހާސިލްވެފައިވާ ކަމަށް ހެލްތު މިނިސްޓްރީން ބުންޏެވެ.

ހެލްތު މިނިސްޓްރީން ބުނީ މި މަސައްކަތް ކުރިއަށް ގެންދެވުނު ގޮތާއި، ރަށްރަށުގައި ބެލި ނެތް ކަމުގެ ވެރިފިކޭޝަން މަސައްކަތުގެ ތެރެއިން ފާހަގަކުރެވުނު ކަންކަމާއި ހާސިލްކުރެވުނު ކަންކަމުގެ މައުލޫމާތު، ދުނިޔޭގެ ސިއްހަތު ޖަމިއްޔާ އާއި ހިއްސާކޮށްފައިވާ ކަމަށެވެ.

ލެޕްރަސީ ނެތް ރަށްތައް ކަނޑައެޅުމަށް ކުރެވުނު މަސައްކަތުގެ ތެރޭގައި، ލެޕްރަސީ ބަލި ދެނެގަތުމާއި، ބައްޔަށް އާއްމުން ސްކްރީން ކުރުމާއި،  ލެޕްރަސީއަށް ދޭން ޖެހޭ ފަރުވާތަކުގެ އިތުރުން ބައްޔާމެދު ދެކޭގޮތް ބަދަލުކުރުމަށް ސިއްހީ ހިދުމަތްތެރިން ތަމްރީން ކުރުން ފަދަ ކަންކަން ކޮށްފައިވާ ކަމަށް މިނިސްޓްރީން ބުންޏެވެ. 

ލެޕްރަސީ ބައްޔަކީ ކުރީގައި ރާއްޖޭގެ ގިނަ ބަޔަކު ތަހައްމަލު ކުރި ބައްޔެކެވެ. ނަމަވެސް 1982 ވަނަ އަހަރު ރާއްޖޭގައި ލެޕްރަސީ ބައްޔަށް ބޭސް ތައާރަފްކޮށް ރަގަޅު އިންތިޒާމެއްގެ ދަށުން ފަރުވާ ދެވެން ފެށުމާއިއެކު ބަލިޖެހޭ މީހުންގެ އަދަދު ވަނީ ވަރަށް ބޮޑަށް ދަށްވެފަ އެވެ. މިއާއެކު 1997 ވަނަ އަހަރު ލެޕްރަސީއަކީ ރާއްޖޭގެ އާންމު ސިއްހަތަށް އޮތް ނުރައްކަލެއް ނޫންކަމުގައި ޑަބްލިއުއެޗްއޯއިން ވަނީ ކަނޑައަޅައިފަ އެވެ.

ލެޕްރަސީގެ އިތުރުން ރާއްޖެއިން ރުބެއްލާ އަދި ޓީބީ ފަދަ ބަލިތައް ނައްތާލުމުގެ މަސައްކަތް ވެސް މިނިސްޓްރީން ދަނީ ކުރަމުންނެވެ.