"ރާއްޖޭގައި ހައްދަންވީ ކުދި ބިންތަކުގައި މަތީ އަގު ލިބޭ އުފެއްދުން"

ދަނޑުވެރިކަމުގެ ވިޔަފާރި ތަރައްގީ ކުރަން ރާއްޖެއަށް ބޭނުން ވަނީ ޓެކްނޮލޮޖީގެ އެހީގައި ކުދި ބިންތަކުގައި މަތީ އަގު ލިބޭ އުފެއްދުން ތައް ހައްދަން ކަމަށް ދަނޑުވެރި ކަމާބެހޭ މިނިސްޓަރު ޑރ. ހުސައިން ރަޝީދު ހަސަން ވިދާޅު ވެއްޖެ އެވެ. 

މިއަދަކީ ރާއްޖޭގައި ދަނޑުވެރިންގެ ދުވަހުގެ ގޮތުގައި ފާހަގަ ކުރާ، ދަނޑުވެރިކަމުގެ ދުވަހެވެ. 

ދަނޑުވެރިންގެ ދުވަހުގެ މުނާސަބަތާ ގުޅުވާލައްވައި ރާއްޖޭގެ ދަނޑުވެރިންނަށް ތަހުނިޔާ ވިދާޅުވުމާއެކު ހުސައިން ރަޝީދު ވިދާޅުވީ  ރާއްޖެއަކީ ދަނޑުވެރިކަން ކުރުމަށް ލިބެން އޮތް ބިން ނިސްބަތުން ކުޑަ އަދި ޓޫރިޒަމް އިންޑަސްޓްރީއަށް ވަރަށް ބޮޑަށް ބަރޯސާވާ ގައުމެއް ކަމަށެވެ.

އަދި އޭނާ ވިދާޅުވީ ރާއްޖޭގެ ދަނޑުވެރިކަމާއި ދަނޑުވެރިކަމުގެ ވިޔާފާރި އިތުރަށް ފުޅާކޮށް ތަރައްގީ ކުރާނަމަ މިހާރު އެންމެ ބޭނުންވަނީ ދަނޑުވެރިކަމުގައި އުފައްދާ ތަކެއްޗަކީ ދިވެހިންގެ ކާބޯތަކެތީގެ ރައްކާތެ ރިކަމަށާއި ފަތުރުވެރިކަމުގެ މާކެޓަށް އަމާޒުކޮށް އުފެއްދުމާއެކު ޒަމާނީ ޓެކްނޮލޮޖީގެ އެހީގައި ކުދި ބިންތަކުގައި އުފައްދާ މަތީ އަގު ލިބޭ އުފެއްދުންތަކަށް ހަދަން ކަމަށެވެ.

މިނިސްޓަރު ހުސައިން ރަޝީދު އެހެން ވިދާޅުވި އިރު އޭނާ ނިސްބަތްވެ ވަޑައިގަންނަވާ ސަރުކާރު މި އަނަނަ ނޮވެމްބަރު މަހުގެ 17 ވަނަ ދުވަހު ނިމޭނެ އެވެ. އެ ދުވަހު ރާއްޖޭގައި ޑރ. މުހައްމަދު މުއިއްޒުގެ ރިޔާސީ ދައުރެއް ފަށާއިރު މިދިއަ ފަސް އަހަރު ދުވަހު ދަނޑުވެރިކަން ތަރައްގީ ކުރުމަށް ފާހަގަކޮށްލެވޭ މަސައްކަތްތަކެއް ކޮށްފައް ނެތެވެ. ދަނޑުވެރި ކަމުގެ އިތުރުން މަސްވެރިކަން ހަވާލުވެފައި އޮންނަނީ ވެސް ހުސައިން ރަޝީދަށެވެ.