އެމްއައިޓީޑީސީ | ޔޮޓު ރެލީގައިޖެހި އާމްދަނީ އޮޔާ ގޮސްފައި

މޯލްޑިވްސް އިންޓަގްރޭޑެޓް ޓޫރިޒަމް ޑިވްލޮޕްމެންޓް ކޯޕަރޭޝަން (އެމްއައިޓީޑީސީ) އުފެއްދި މަގުސަދަކީ އިންޓެގްރޭޓެޑް ޓޫރިޒަމް ތަރައްގީ ކުރާށެވެ. ކުރިން ރައީސް އަބްދުﷲ ޔާމީންގެ ސަރުކާރުން އުފެއްދި މި ކުންފުނި ރައީސް އިބްރާހިމް މުހައްމަދު ސޯލިހުގެ ސަރުކާރަށް ބަދަލުވުމާއެކު ކުންފުންޏަށް ވަން މެނޭޖުމަންޓުން ވަރަށް "ފޮނި" ވާހަކަ ދައްކާފައި އެއްކަމެއް ވެސް ނުކުރެވުނެވެ.  އެހެން ފޮނި ކަނޑާން ތިބެފައި ފެށީ، ޔޮޓް މޯލްޑިވްސް ޔޮޓް ރެލީ އެވެ. ބޮޑު ހަރަދުކޮށްގެން ފެށި މި ރޭހުން ކޮންމެ ވެސް އާމްދަނީއެއް ކޮންމެ އަހަރަކު ވެސް ހޯދަ އެވެ. މި އަހަރުގެ ފުރަތަމަ ކުއާޓަރަށް ބަލާނަމަ އެ ކުންފުނީގެ އާމްދަނީ އޮޔާ ގޮސްފައި ވަނީ މި ޔޮޓު ރޭހަކާ ހެދި އެވެ. އަނެއްކޮޅުން އެއްވެސް ކަމަށް ނުކޮށް ތިބާ ސަރުކާރު މި ދަނީ ބަދަލުވާށެވެ. އާ. ބަޔަކު ގޮސް ވަންނަ އިރު އެތަން އޮންނާނީ އަތްލާން ނުކެރޭ ވަރަށް ހަލާކުވެފަ އެވެ. 

މެދުފަންތީގެ ޓޫރިޒަމް ތަރައްގީ ކުރަން އުފެއްދި އެމްއައިޓީޑީސީގެ މާލީ ހިސާބުތައް ދައްކާ ގޮތުގައި ޔޮޓް ރެލީއިން ލިބުނު އާމްދަނީ ދަށްވުމުގެ ސަބަބުން އެ ކުންފުނީގެ އާމްދަނީއަށް ވަނީ ހީނަރުކަން އައިސްފަ އެވެ. ކުންފުންޏަށް މިދިޔަ އަހަރުގެ ފުރަތަމަ ކުއާޓަރުގައި އާމްދަނީގެ ގޮތުގައި 1.12 މިލިއަން ރުފިޔާ ލިބުނެވެ. ނަމަވެސް މި އަހަރުގެ ފުރަތަމަ ތިން މަހު ލިބުނީ 0.81 މިލިއަން ރުފިޔާ އެވެ. މިއީ އާމްދަނީ 28 ޕަސެންޓަށް ދަށްވެފައި ވުމެވެ.  

އާމްދަނީ ދަަށްވުމުގެ ސަބަބަކީ އެމްއައިޓީޑީސީން "ސަވާދީއްތަ" ދަތުރުގެ ނަމުގައި ބާއްވަމުން އަންނަ ޔޮޓު ރެލީއިން ލިބުނު އާމްދަނީ މި އަހަރު ބޮޑު ތަނުން ދަށްވުމެވެ. 

މި ކުންފުނި އުފެއްދިއިރު 20 މުވައްޒަފުން ތިބި ނަމަވެސް މިހާރު ތިބީ 12 މުވައްޒަފުންނެވެ. ކުންފުނީގެ މުވައްޒަފުންގެ މުސާރައަށް ކުންފުންޏަށް ލިބޭ ފައިސާގެ 59 ޕަސެންޓް ހަރަދު ކުރަމުން ގެންދެ އެވެ.