އަމްރުގެ ދައުވަތެއް: އެމްޑީޕީ މަޖިލިސް މެންބަރުން ޑިމޮކްރެޓްސްއާ ގުޅެންވީ ވަގުތަކީ މިއީ

ގައުމަށް ހެޔޮ އެދޭ / ސިޔާސީ ހަމަޖެހުމަށް އިސްކަން ދޭ އެމްޑީޕީގެ މަޖިލީސް މެންބަރުން ދަ ޑިމޮކްރެޓްސްއާ ގުޅިވަޑައިގަތުމަށް އެ ޕާޓީގެ ރައީސް ކަމަށް ވާދަ ކުރައްވާ އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ދައުވަތު ދެއްވައިފި އެވެ.

އަމްރަކީ ނިމިގެންދިޔަ ރިޔާސީ އިންތިހާބުގައި ޑިމޮކްރެޓްސް އިން ނެރުނު ރިޔާސީ ކެންޑިޑޭޓް އިލްޔާސް ލަބީބުގެ ރަނިންމޭޓް ވެސް މެއެވެ.

"އެކްސް" ގައި އަމްރު ވިދާޅުވީ ސިޔާސީ ހަލަބޮލި ކަމަށް ނިމުން އަންނަން ޖެހޭ ކަަމަށާއި ރައްޔިތުންނަށް ހަމަ ނޭވާ އެއް ލެވެން ޖެހޭ ކަމަށެވެ. އޭނާ ވަނީ ގައުމަށް ހެޔޮ އެދިވަޑައިގަންނަވާ އަދި ގައުމުގެ ސިޔާސީ ހަމަޖެހުމަށް އެންމެން އިސްކަން ދިނުމަށް ގޮވާލައްވާފަ އެވެ. އަދި ގޮވާލެއްވީ ގައުމީ މަސައްކަތުގައި ތިއްބެވި އެމްޑީޕީގެ މަޖިލީސް މެންބަރުން ދަ ޑިމޮކްރެޓްސްއާ ގުޅިވަޑައިގަތުމަށެވެ.

އަމްރު ވިދާޅުވި ގޮތުގައި މިއީ އެކަމަށް އެންމެ ރަނގަޅު ވަގުތެވެ.

މިހިނގާ 19 ވަނަ ރައްޔިތުންގެ މަޖިލީހުގައި އެމްޑީޕީއަށް 65 ގޮނޑި ލިބުނެވެ. އެއީ ސިޔާސީ ޕާޓީއަކަށް މަޖިލީހުގެ މިހާ ބޮޑު އަޣުލަބިއްޔަތެއް ރައްޔިތުން ދިން ފުރަތަމަ ފަހަރެވެ. ނަމަވެސް އެމްޑީޕީގެ 13 މެންބަރަކު އެ ޕާޓީން ވަކިވެ ދަ ޑިމޮކްރެޓްސް ނަމުގައި ވަނީ ޕާޓީއެއް އުފައްދާފަ އެވެ. ފަހުން އެމްޑީޕީއާ ގުޅުނު މެންބަރުންނާއެކު މިވަގުތު އެމްޑީޕީގައި 54 މެންބަރުން އެބަ ތިއްބެވެ. މި ފަހުން މައްޗަންގޮޅީ ދެކުނު ދާއިރާގެ މެންބަރު އަހްމަދު ހައިތަމާއި ފޮނަދޫ ދާއިރާގެ މެންބަރު މޫސާ ސިރާޖު ވަނީ އެމްޑީޕީން ވަކިވެވަޑައިގެންފަ އެވެ.

ސިރާޖު ގުޅިވަޑައިގަތީ އިދިކޮޅު ޕީޕީއެމާ އެވެ. ހައިތަމް އަދި ވަކި ޕާޓީއަކާ ގުޅިވަޑައި ނުގަންނަވަ އެވެ. 

އޭގެ ކުރީން އަމިއްލަ މެންބަރުންގެ ގޮތުގައި ތިއްބެވި ވިލިނގިލީ ދާއިރާގެ މެންބަރު ސައުދު ހުސައިންއާ ނިލަންދޫ ދާއިރާގެ މެންބަރު އަބްދުލް މުހުސިން ހަމީދާއި ޖުމްހޫރީ ޕާޓީގެ މެންބަރެއްގެ ގޮތުގައި ހުންނެވި އިސްދޫ ދާއިރާގެ މެންބަރު އަލީ ހަމީދު ވަނީ އެމްޑީޕީއާ ގުޅިވަޑަައިގެންފަ އެވެ.