އަންހެނަކު ފިހާރައަކަށް ވަދެ ބިދޭސީ ސޭޓުގެ ކަރުގައި ވަޅި އަޅައިފި

ވީޑިއޯއިން ފެންނަ ގޮތުގައި ފިހާރައަށް ވަދެގެން އަންނަ އަންހެން މީހާ ހުރީ ރީތިކޮށް ހެދުން އަޅައިގެންނެވެ. އޭނާ ވަދެގެން ދިޔައިރު ނުރައްކާތެރި ހަމަލައެއް ދީފާނެ ކަމަށް ހީކުރާނީ ކާކު ހެއްޔެވެ؟ 

ސޯޝަލް މީޑިއާގެ ބައެއް ޕްލެޓްފޯމްތަކުގައި ވެސް މިހާރު ދައުރުވާ ވީޑިއޯއިން ފެންނަ ގޮތުގައި މިނެޓެއްހާއިރު ފަހުން މުޅި މަންޒަރު ބަދަލުވެ އެވެ. އެ ވީޑިއޯއިން ފެންނަނީ އަަންހެން މީހާ ކުއްލި ހަރަކާތަކުން ވަޅި ނަގައި ސޭޓަށް ވަޅީން ހަމަލާދޭ ތަނެވެ. ވަޅީގެ ހަމަލާ އެރީ ކައުންޓަރުގައި އިން ބިދޭސީ ސޭޓުގެ ކަރުގެ އަރިމައްޗަށެވެ. 

މާލޭގެ އެންމެ ކާރޫބާރު ބޮޑު މަޖީދީމަގުގައި ހުންނަ "ޑްރީމް މޮބައިލް ޕްލަސް" ފިހާރާގައި މި ހާދިސާ ހިނގި ގޮތް އެނގޭ މީހަކު "މި" ނޫހަށް ކިޔައިދިން ގޮތުގައި މިއަދު ހެނދު ފިހާރަ ހުޅުވިތާ މާގިނަ އިރެއް ނުވެ އެ ފިހާރައަށް ވަތް އެ "ކަސްޓަމަރު"  ހޯދީ ފޯނެއް ގަންނަން ބޭނުންވާ ފޯނުގެ މައުލޫމާތެވެ. 

"ބިދޭސީ ސޭޓު ކައިރީ އެހީ ފޯނެއްގެ މައުލޫމާތު. މައުލޫމާތު ސާފުކޮށްފަ އިރުކޮޅަކުން ވަޅިން ހަމަލާ ދިނީ،" ނަން ނެޖުހުމަށް އެދި އޭނާ ކިޔައިދިނެވެ. 

ވީޑިއޯއިން ފެންނަ ގޮތުގައި އެ އަންހެން މީހަކާ ހުރީ އިނގިރޭސި ފިލްމްތަކުގައި އުޅޭ ތަރިން އަޅާ ޒާތުގެ ފުރިހަމަ ހެދުމެއްގަ އެވެ. ހަމަލާދިން ވަޅި އޮތީ ހެދުމުގެ ތެރޭގައި ފޮރުވާފަ އެވެ. ހަމަލާ ދިން އަންހެން މީހާގެ އުމުރަކީ 29 އަހަރެވެ. އޭނާ އެ ފިހާރައަށް ވަންއިރު ކަނާތުގެ އިނގިލިތައް ފޮރުވާ ޒާތުގެ އަންގިއެއް ލައްވާފައި އެވެ. އޭނާގެ ވައަތުގައި ނާޑުވާއެއް ޒާތުގެ އެއްޗެއް އޮތްތަން ވީޑިއޯއިން ފެނެ އެވެ. 

ފިހާރައަށް ވަން ގޮތަށް ފޯނެއް ބަލާލަން އޭނާ އެދެ އެވެ. އަދި ކައުންޓަރުގައި އިން ސޭޓު ފޯނުތައް ލާފައިވާ ވަތްގަނޑުން ފޯނެއް ނަގަ އެވެ. އޭގެ ފަހުން ފެންނަނީ އެ އަންހެން މީހާ އެ ފޯނު ބަލާލާފައި ކައުންޓަރު މައްޗަށް އެއްލާލައި ތަނެވެ. ފޯނު އެއްލާލުމުން ސޭޓު ފޯނު ފޮހެލަ އެވެ. އޭގެ އިރުކޮޅެއް ފަހުން ފުރަގަސް ދީ ދާން އުޅޭހެން ހީވެ އެވެ. 

އެކަމަކު އޭނާ ފުރަގަސް ދިނީ އެނބުރި ދާކަށެއް ނޫނެވެ. ފުރަގަސް ދިނުމަށްފަހު ހެދުމުގެ ތެރޭގައި އޮތް ވަޅިން ހަމަލާދެ އެވެ. "މި" ނޫހަށް ލިބިފައިވާ ފޮޓޯ އިން ފެންނަ ގޮތުގައި ބިދޭސީ ސޭޓުގެ ވަޅި އެޅިފައިވަނީ ކަރުގެ އަރިމަތީގަ އެވެ. ވައިނޮޅި ބުރި ނުވީ ކިރިޔާ އެވެ. 

މި ހާދިސާއާއި ގުޅިގެން ފުލުހުން ވަނީ ތޫނު އެއްޗަކުން ހަމަލާދީފައިވާ މީހަކަށް އޭޑީކޭގައި ފަރުވާ ދެމުންދާ ކަމަށް ބުނެފަ އެވެ. އަދި އެ މައްސަލައާއި ގުޅިގެން 29 އަހަރުގެ އަންހެނަކު ހައްޔަރު ކޮށްފައިވާ ކަމަށް ވެސް ބުނެފައި ވެއެވެ. މި މައްސަލަ ބަލައި ތަހުގީގު ކުރަން ވަނީ ފަށާފަ އެވެ.