ފަސް މިލިޔަން ރުފިޔާގެ ޑުރަގު ޕޯސްޓުން އެތެރެކޮށްފި

ޕޯސްޓް މެދުވެރިކޮށް 1.6 ކިލޯގެ ޑުރަގް އެތެރެ ކުރަން އުޅެފި އެވެ.

މޯލްޑިވްސް ކަސްޓަމްސް ސާވިސް އިން މިރޭ ބުނީ މި މަހުގެ 25 ވަނަ ދުވަހު ޕޯސްޓް މެދުވެރިކޮށް ރާއްޖެ ގެނެސްފައިވާ ޕެކޭޖްތަކެއް ބަލާ ފާސް ކުރަން އުޅުމުގެ ތެރޭގައި މަސްތުވާތަކެތި ފެނިފައިވާ ކަމަށެވެ. މިއީ ޖަރުމަނުން ރާއްޖެ ގެނެސްފައިވާ ޕެކޭޖްތަކެކެވެ. އެއިން ފެނިފައި ވަނީ މަސްތުވާތަކެތި ހުރި ހަތަރު ޕެކެޓެވެ.

ފުރަތަމަ މަރުހަލާގައި މި ތަކެތި ތަހުލީލު ކުރިއިރު ދެ ޕެކެޓްގައި ހުރީ މަސްތުވާތަކެތީގެ ބާވަތެއް ކަމަށްވާ ކެޓަމައިން އެވެ. ދެން ހުރީ ކޮކެއިންނެވެ. ބަރުދަނުގައި 1.674 ކިލޯ ހުއްޓެވެ. މަގުމަތީ އަގުން ބަލާނަމަ އެއީ ފަސް މިލިއަން ރުފިޔާގެ މަސްތުވާތަކެއްޗެވެ.

ކަސްޓަމުން ބުނި ގޮތުން އަތުލައިގަނެވުނު މަސްތުވާތަކެތި މިހާރު ވަނީ އިތުރު ތަހުގީގަށް ފުލުހާއި ހަވާލުކޮށްފައެވެ.