ބަލިވެގެން ދިޔައިރު ތިން ސަރުކާރެއްގައި ހުރިން، މިވަރުގެ ގައުމު ފަނާކުރަނިވި އަމަލުތަކެެއް ނުދެކެން: އާޒިމާ

ބަލިވެގެން ދިޔައިރު ތިން ސަރުކާރެއްގައި ހުންނެވި ކަމަށާ ނަމަވެސް މި ސަރުކާރުން ފެންނަ ފަދައިން ގައުމު ފަނާކުރަނިވި ވިސްނުންތަކެއް އަދި އަމަލުތަކެއް ދެކެވަޑައިނުގަންނަވާ ކަމަށް ކުރީގެ ބަންޑާރަ ނާއިބު އަލްއުސްތާޛާ އައިޝަތު އާޒިމާ ޝަކޫރު ވިދާޅުވެއްޖެ އެވެ.

އާޒިމާ މިހެން ވިދާޅުވީ ރިޔާސީ އިންތިހާބުގެ ދެވަނަ ބުރުން ކާމިޔާބު ހޯދުމަށް ސަރުކާރުން ކުރަމުންދާ ކަންކަމަށް އިޝާރާތް ކުރައްވައެވެ. އިންތިހާބުގެ ދެވަނަ ބުރަށް ހަފުތާއެއް އޮއްވާ އިތުރު 6،000 ފްލެޓާއި 4،000 އަށް ވުރެން ގިނަ ގޯތި ދޭން ސަރުކާރުން ވަނީ ކުއްލި ގޮތަކަށް ނިންމާފައެވެ. އެ ނިންމުމާއެކު ރޭ ދަންވަރު އެ ފުރުސަތު ވަނީ ހުޅުވާލާފައެވެ.

އެކަމަށް އިޝާރާތް ކުރައްވާ މި ފަހުން ރާއްޖެ ދުށް އެންމެ ކުޅަދާނަ އެއް ގާނޫނީ ވަކީލާ އާޒިމާ ވިދާޅުވީ ބަލިވެގެން ދިޔައިރު ތިން ސަރުކާރެއް ގައި ހުންނެވުމުގެ ފުރުސަތު އެކަމަނާއަށް ލިބިވަޑައިގެން ކަމަށެވެ. އަދި ހަމަޖެހުމާއި އަމާންކަމާއެކު ވެރިކަން ކުރުމުގައި ބައިވެރިވެވަޑައިވެސް ގެންފައިވާ ކަަމަށެވެ. އެ ތިން ފަހަރާއި މިހާރު ހިނގަމުންދާ ކަންކަން ތަފާތު ކަމުގައި ވިދާޅުވެ އާޒިމާ ވަނީ މިވަރުގެ ގައުމު ފަނާކުރަނިވި ވިސްނުންތަކެއް އަދި އަމަލުތަކެއް ދެކެވަޑައިނުގަންނަވާ ކަމަށް ވިދާޅުވެފައެވެ.

2008 ވަނަ އަހަރުގެ އިންތިހާބުން ރައީސް މައުމޫނަށް ނާކާމިޔާބުވެ އެމަނިކުފާނުގެ 30 އަހަރުގެ ވެރިކަން ނިމިގެންދިޔައިރު އާޒިމާ ހުންނެވީ ސަރުކާރުގައެވެ. އޭރު އެކަމަނާ އަކީ ދައުލަތުގެ ބަންޑާރަ ނާއިބެވެ. ރައީސް ވަހީދުގެ ވެރިކަން ނޮވެންބަރު 17، 2013 ގައި ނިމިގެންދިޔައިރު އާޒިމާ ހުންނެވީ ރައީސް ވަހީދުގެ އެޑްވައިޒަރަކަށެވެ. އޭގެ ކުރީން 2012 ވަނަ ބަންޑާރަ ނާއިބު ކަންވެސް ކުރެއްވި އެވެ.

ނޮވެންބަރު 17، 2018 ގައި ރައީސް ޔާމީންގެ ވެރިކަން ނިމިގެންދިޔައިރު އާޒިމާ ހުންނެވީ ރައީސް އޮފީހުގެ ލީގަލް އެފެއާޒް މިނިސްޓަރުގެ މަގާމުގައެވެ. ބަލިވެގެން ދިޔައިރު ތިން ސަރުކާރެއްގައި ހުންނެވި ކަމަށް އެކަމަނާ އެ ވިދާޅުވީ އެކަމަށް އިޝާރާތް ކުރައްވައެވެ.

އެ ތިން ފަހަރުވެސް ސަރުކާރު ބަދަލު ވުމުގެ ކަންކަމާއި އޮމާން ކަމާއެކު ކަންކަން ކުރިިއަށް ގެންދެވުމުގައި އާޒިމާ ވަނީ އިސް ދައުރެއް އަދާ ކުރައްވާފައެވެ.