ކޮކާ-ކޯލާ އާއި މޯޕާގެ މަގުސަދު - ކަނޑުތަކަށް ކުނި އެޅުން ހުއްޓުވުން

އިންޓަނޭޝަނަލް ކޯސްޓަލް ކްލިން އަޕް ދުވަހުގެ ޝިއާރަކީ ކުނި ނެތް ކަނޑުތަކެއް ކަށަވަރު ކުރުމެވެ. އެހެންވެ ރާއްޖޭގެ ކޮކާކޯލާ އާއި މޯޕާ ޖަމިއްޔާ އިން މިވަނީ ކަނޑުތަކަށް ކުނި އެޅުން ހުއްޓުވަން ފިޔަވަޅުތަކެއް އަޅަން ފަށާފަ އެވެ. 

ދުނިޔޭގެ އެކި ކަންކޮޅު ތަކުން އެތައް މިލިއަން ވޮލަންޓިއަރުންނެއް މިއަދު ގޮނޑުދޮށްޓާއި ކަނޑު ތަކުން ކުނި ނައްތާލުމަށް ދުނިޔޭގެ ފެންވަރުގައި ހިންގާ އިންޓަނޭޝަނަލް ކޯސްޓަލް ކްލިންއަޕް ޑޭ ހަރަކާތުގައި ދަނީ ބައިވެރިވަމުންނެވެ.

ރާއްޖޭގެ ކޮކާ-ކޯލާ ކޮމްޕެނީ އާއި މޯލްޑިވްސް އޯޝަން ޕްލާސްޓިކް އެލަޔަންސް (މޯޕާ) މިއަދު ވަނީ ޕްލާސްޓިކް މަދުކޮށްގެން ކުނިބުނިން ރައްކާތެރިވެފައިވާ ކަނޑުތަކެއްގެ ލަނޑުދަނޑި ހާސިލް ކުރަން މަސައްކަތްތަކެއް ފަށާފަ އެވެ.  މޯޕާ އާއި ގުޅިގެން ކޮކާ-ކޯލާ އިން 2021 ވަނަ އަހަރުން ފެށިގެން އަންނަނީ 100 އިންސައްތަ ރީސައިކަލް ކުރެވޭ ޕްލާސްޓިކް ފުޅި އެއްކޮށް ރީސައިކަލް ކުރުމުގެ ތަފާތު މަޝްރޫއެއް ހިންގަމުންނެވެ. އެގޮތުން ފާއިތުވި ދެ އަހަރާއި ބައިގެ ތެރޭގައި 200 ހާސްއަށް ވުރެ ގިން ކޯކް ޕެޓް ފުޅި އެއްކޮށް، އެ ތަކެތި ނައްތާލާފައިވެ އެވެ. 

މި މަޝްރޫއުގެ އަމާޒަކީ 2030 ވަނަ އަހަރު އަންނަން ވާއިރަށް ވިއްކާ ކޮންމެ ފުޅިއެއް ނުވަތަ ދަޅެއްގެ ބަދަލުގައި އެފަދަ ދަޅެއް ނުވަތަ ފުޅިއެއް އެއްކޮށް ރީސައިކަލްކޮށް، 2025 ވަނަ އަހަރުގެ ނިޔަލަށް ޕެކޭޖިންގެ 50 ޕަސެންޓަކީ ރީސައިކަލް ކުރެވޭނެ ތަކެއްޗަށް ހެދުމެވެ. މި މަގުސަދުގައި ކޮކާ-ކޯލާ މޯލްޑިވްސް އާއި މޯޕާ ގުޅިގެން ތިން މަޝްރޫއެއްގެ މަސައްކަތް ކުރިއަށް ގެންދެ އެވެ.

ފުރަތަމަ މަޝްރޫއަކީ މާލެ އާއި ހުޅުމާލެ އަދި އެންމެ ދެކުނުން އައްޑޫ ސިޓީން ޕެޓް ފުޅި އެއްކުރުމަށް ފަހު، އެ ތަކެތި ރީސައިކަލް ކުރުމަށް ރާއްޖެ އިން ބޭރަށް ގެންދިއުމަށް ހިންގާ ރިވާސް ޕެޓް ކަލެކްޝަން ޕްރޮޖެކްޓެކެވެ. މި މަޝްރޫއުގެ ސަބަބުން ކުނި އެއްކުރާ ފަރާތްތަކަށާއި އެކި ތަންތަނަށް ގެންގޮސްދޭ ފަރާތްތަކަށް އާމްދަނީ ހޯދުމުގެ ފުރުސަތުތައް ވެސް ލިބިގެންދެ އެވެ.


ދެވަނަ މަޝްރޫއަކީ ރާއްޖޭގެ އެކި އަތޮޅުތަކެއް ހިމެނޭ ގޮތަށް މި ވަގުތު ހަތަރު ރަށެއްގައި އައިލެންޑް ޕެޓް ކަލެކްޝަން ޕްރޮޖެކްޓް ކުރިއަށް ގެންދިއުމެވެ. މި މަޝްރޫއުގެ ދަށުން ގޭބިސީތަކާއި ފިހާރަތަކާއި ސްކޫލްތަކާއި އެހެނިހެން ތަންތަނުން ބޭނުންކުރުމަށް ފަހު ދޫކޮށްލާ ޕެޓް ފުޅި އެއްކޮށް، އިތުރަށް ޕްރޮސެސް ކުރުމަށް މާލެއަށް ފޮނުވާނެއެވެ. އޭގެ ނަތީޖާއެއްގެ ގޮތުން، މިއަހަރުގެ ފުރަތަމަ ހަ މަސްދުވަހުގެ ތެރޭގައި 60،000 ކިލޯގެ ކުނި އެއްކުރެވިފައިވެ އެވެ. އަދި ކުނި ރަނގަޅަށް ބެލެހެއްޓުމާއި ރީސައިކަލް ކުރުމުގެ މުހިންމުކަމާ މެދު މުޖުތަމައުތަކުގެ މެދުގައި ހޭލުންތެރިކަން އިތުރުވެގެން ދެއެވެ.

ތިންވަނަ މަޝްރޫއަކީ މިއީ ރާއްޖޭގެ ފަތުރުވެރިކަމުގެ ދާއިރާއަށް އަމާޒުކޮށްގެން ހިންގާ ރިސޯޓް ޕެޓް ކަލެކްޝަން ޕްރޮޖެކްޓެވެ. މި މަޝްރޫއުގެ ދަށުން އުތުރުން ށ. އަދި ނ. އަތޮޅާއި މެދުރާއްޖެތެރެއިން ކ. އަތޮޅުގެ އިތުރުން، ދެކުނުން ދ. އަތޮޅާއި އައްޑޫ ފަދަ ބައެއް ބޮޑެތި އަތޮޅުތަކުގައި ހިންގާ ރިސޯޓްތަކުން ބޭނުންކުރާ ޕެޓް ފުޅި އެއްކޮށް، ރީސައިކަލް ކުރުމަށް މާލެ ފޮނުވަ އެވެ.

މި މަސައްކަތްތައް އިތުރަށް ފުޅާކުރުމަށް، މޯޕާއިން ދާދި ފަހުން ވަނީ ރާއްޖޭގެ ފުރަތަމަ މެޓީރިއަލް ރިކަވަރީ ފެސިލިޓީ (އެމްއާރުއެފް) އިފްތިތާހުކޮށްފަ އެވެ. ރަށްރަށުގެ ކައުންސިލްތަކާއި ރިސޯޓްތަކާއި ގެސްޓްހައުސްތައް ފަދަ ފަރާތްތަކާ ގުޅިގެން ކޮކާ-ކޯލާ މޯލްޑިވްސް އާއި މޯޕާ އިން ވެސް އަންނަނީ މުޖުތަމައަށް އެހީތެރިކަން ފޯރުކޮށްދީ، އެއްބާރުލުމާއި އީޖާދީ ވިސްނުން ކުރިއަށް ނެރުމުގެ ސަގާފަތެއް އާލާކުރަމުންނެވެ.