ޓޫރިސްޓް ޑެއިލީ އެރައިވަލް ދަށް | ޖުމްލަ 970,581 އަށް

މި އަހަރުގެ މިހާތަނަށް ޓޫރިސްޓު ޑެއިލީ އެރައިވަލް ބޮޑުތަނުން ދަށްކޮށް ހުރިއިރު، މިހާތަނަށް ރާއްޖެއަށް އައި ޓޫރިސްޓުންގެ ޖުމްލަ 970,581 އަށް އަރައިފި އެވެ. 

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން މިދިޔަ އަހަރުގެ މި މުއްދަތާ ހަމައަށް އެއް މިލިއަން އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، މި އަހަރުގެ މި މުއްދަތުގައި ޒިޔާރަތްކުރީ 970,581 ފަތުރުވެރިންނެވެ. މިއީ ރާއްޖެއަށް ޒިޔާރަތްކުރި ޖުމްލަ ޓޫރިސްޓުންގެ އަދަދު ދެ އަހަރު އަޅާކިޔާނަމަ 4.7 އިންސައްތަ ދަށްވުމެކެވެ. 

މިއަހަރުގެ ޖެނުއަރީ މަހު ފަތުރުވެރިކަން 5.0% ކުރިއެރުނުއިރު، ފެބުރުއަރީ މަހު ވަނީ 15.7% ބޮޑު ކުރިއެރުމެއް ހޯދާފައެވެ. އެގޮތުން ފެބުރުއަރީ މަހު އެކަނި ވެސް 254,556 ޓޫރިސްޓުން ރާއްޖެއަށް ޒިޔާރަތްކުރި އެވެ. ނަމަވެސް، މާރިޗު މަހުން ފެށިގެން މިސްރާބު ބަދަލުވެ، އެ މަހު ފަތުރުވެރިން އައި އަދަދު ވަނީ 20.7% ދަށަށް ގޮސްފަ އެވެ. އަދި އެޕްރީލް މަހު މި އަދަދު ވަނީ 24.4% ދަށަށް ގޮސް 152,861 އަށް ދަށްވެފަ އެވެ. 

ޓޫރިޒަމް މިނިސްޓްރީން ބުނި ގޮތުގައި މިދިޔަ މޭ މަހު ޓޫރިޒަމް ކުޑަކޮށް ހަމައަކަށް އެޅި، 1.7 % ގެ ކުޑަ ކުރިއެރުމެއް 142,555 ޓޫރިސްޓުން ރެކޯޑު ކުރެވުނެވެ. ނަމަވެސް، ޖޫން މަހުގެ ފުރަތަމަ ހަފުތާގެ ތަފާސްހިސާބުތަކުން އަނެއްކާ ވެސް ދައްކަނީ މިދިޔަ އަހަރުގެ އެ މުއްދަތާ އަޅާބަލާއިރު 24.5% ދަށްވުމެކެވެ.

ޖުމްލަ ޓޫރިސްޓުންގެ އަދަދު ދަށަށް ދިޔަ ނަމަވެސް، ކްރޫޒްލައިނާތަކުގައި ނުވަތަ ބޮޑެތި މަތިންދާބޯޓު ފަހަރުގައި ކަނޑުމަގުން އަންނަ ޓޫރިސްޓުންގެ އަދަދު ވަނީ މިއަހަރު ވަރަށް ބޮޑަށް އިތުރުވެފައެވެ. އަދި މިދިޔަ އަހަރުގެ މިހާތަނަށް ކްރޫޒްލައިނާތަކުން 8,263 ޓޫރިސްޓުން އައިސްފައިވާއިރު، މި އަހަރުގެ މިހާތަނަށް މި އަދަދު ވަނީ 14,847 އަށް އަރާފަ އެވެ. މިއީ ގާތްގަނޑަކަށް 80 % ގެ ކުރިއެރުމެކެވެ. މީގެއިތުރުން ވިޔަފާރި ބޭނުންތަކަށް ރާއްޖެއަށް އަންނަ މީހުންގެ އަދަދު ވެސް ވަނީ 8,029 އެއްގައި ހިފެހެއްޓިފަ އެވެ.