ހިޓާޗީ އާއި އެސްޓީއޯގެ ގުޅުމަށް 25 އަހަރު ފުރުން ފާހަގަކޮށްފި

އެސްޓީއޯގެ މަޝްހޫރު ބްރޭންޑެއް ކަމުގައިވާ ހިޓާޗީގެ ޕަޓްނަރޝިޕަށް 25 އަހަރު ފުރުމުގެ މުނާސަބާ ކުލަގަދަ ގޮތެއްގައި ފާހަގަ ކޮށްފިއެވެ. 

މި މުނާސަބާ ފާހަގަ ކުރުމަށްޓަކައި 28 ނޮވެމްބަރު 2025 ވީ ހުކުރު ދުވަހުގެ ރޭ ބާސެލޯ ނަސަންދުރަގައި ވަނީ ވަރަށް ހާއްސަ ހަފްލާއެއް ބާއްވާފައެވެ.

ގަރުނަކަށް ވުރެ ގިނަ ދުވަސްވީ ހިޓާޗީ ކުންފުންޔަކީ ފެށުނީއްސުރެ ދުނިޔޭގެ ބާޒަރުގައި ނަން ވިދަމުން އަންނަ އިތުބާރު ހިފޭ ކުންފުންޔެކެވެ. މި ކުންފުނީގެ އުފެއްދުންތައް ރާއްޖެއަށް ތައާރަފް ކުރެވުމާއިއެކު، ދިވެހީންގެ މެދުގައިވެސް މި ބްރޭންޑުގެ އުފެއްދުންތައްވަނީ ބޮޑު މަގުބޫލުކަމާއި އިތުބާރެއް ހޯދާ، އަދި މިއަދާއި ހަމައަށްވެސް އެ އިތުބާރު ދަމަހައްޓާފަ އެވެ. އެގޮތުން ހިޓާޗީ އޭސީ ތަކާއި އައިސް އަލަމާރިތައް ފަދަ ޕްރޮޑަކްޓްތަކަކީ ގިނަބަޔެއްގެ ގެތަކުން މިހާރުވެސް ޖާގަ ހޯދަމުން އަންނަ އުފެއްދުންތަކެކެވެ.

މި ހަފްލާ އަކީ އެސްޓީއޯ އާއި ހިޓާޗީ އާ ދެމެދު އުފެދިފައިވާ 25 އަހަރުވީ ގާތް ގުޅުމުގެ އަލިގަދަ ރަމްޒެއް ކަމަށް އެސްޓީއޯ އިން ބުންޏެވެ.

މި ހަފްލާގެ ޝަރަފްވެރި މެހެމާނެއްގެ ގޮތުގައި ބައިވެރިވެ ވަޑައިގެންނެވީ ޖަޕާނުން ރާއްޖެއަށް ކަނަޑައަޅުއްވާފައި ހުންނަވާ ސަފީރު އިޝިގާމީ ރުމިކޯ އެވެ. މީގެ އިތުރުން ހިޓާޗީ ކުންފުނީގެ މެނޭޖިން ޑިރެކްޓަރު އަދި ކުންފުނީގެ އިތުރު ބޭފުޅުން ވަނީ މި ޖަލްސާގައި ބައިވެރިވެ ވަޑައިގަންނަވާފަ އެވެ. އަދި، އެސްޓީއޯގެ ޗެއާމަން އާމިރު މަންސޫރު، އެސްޓީއޯގެ ބޯޑު މެމްބަރުން، އެސްޓީއޯގެ މެނޭޖިންގް ޑިރެކްޓަރު ޝިމާދު އިބްރާހިމްގެ އިތުރުން އެސްޓީއޯގެ ކުރީގެ ބައެއް އިސް ބޭފުޅުން ވެސް ވަނީ މި ހަފްލާގައި ބައިވެރިވެ ވަޑައިގަންނަވާފަ އެވެ. 

މި ހަފްލާގައި ދެ ކުންފުނީގެ އިސް ބޭފުޅުން ދެއްކެވި ވާހަކަތަކަށް އަލިއަޅުވާލާއިރު ހިޓާޗީއާއި އެސްޓީއޯއާއި ދެމެދު އުފެދިފައިވާ ގާތް ގުޅުން ފާހަގަކޮށްފައިވެ އެވެ. އަދި މީގެ އިތުރުން ހިޓާޗީ ބްރޭންޑާއިއެކު، ރާއްޖޭގެ ބާޒާރަށް އައިސްފައިވާ ހެޔޮ ބަދަލުތަކާއި އާމުންގެ ދިރިއުޅުމަށް އައިސްފައިވާ ލުއިފަސޭހަތައް އަދި ކުރިއަށް ރޭވިފައިވާ ކަންކަމަށް ވަނީ އަލިއަޅުވާލާފަ އެވެ.

މި ހަފްލާގައި ރާއްޖޭގައި ވިއްކާ ހިޓާޗީ ބްރޭންޑްގެ އުފެއްދުންތަކުގެ ތެރެއިން ހޮވާލެވިފައިވާ ޕްރޮޑަކްޓްތައް ވަނީ ޑިސްޕްލޭ ކޮށްފަ އެވެ. 

އަދި، ހިޓާޗީއާއި އެސްޓީއޯގެ 25 އަހަރުވީ ޕާޓްނަޝިޕްގައި އެންމެ ގިނައިން ހިޓާޗީ ޕްރޮޑަކްޓްތައް ގަތް ހަތަރު ކަސްޓަމަރެއް އަގުވަޒަންކޮށް، ވަނީ އެވޯޑް ވެސް ދީފަ އެވެ. 

އޭގެ އިތުރުން، އެންމެ ހާއްސަ ކަމެއްގެ ގޮތުން، މި ހަފްލާގައި ހިޓާޗީއިން އަލަށް ތައާރަފް ކުރި 'ހިޓާޗީ ނިއު އެއާ' ރޭންޖްގެ ޕްރޮޑަކްޓްތައް މި ހަފްލާގައި ލޯންޗު ކޮށްފައިވެ އެވެ.