ދެ މިލިއަން ވަނަ ޓޫރިސްޓުން ؛ މޫދުން ނާރާނެ، ގެނައީ ހުސް މޫދު ހެދުން

ވާޖިން އެޓްލާންޓިކް އެއާލައިންގެ ބޯޓު ރާއްޖެއަށް ތިރި ކުރަން ކައިރިވުމާއެކު، ބެތަނީ ސާރާ ކާސްވެލް އަވަހާ ގޮސް ރާއްޖޭގެ ހޫނު މޫސުމާ ގުޅޭ ގޮތަށް ހެދުން ބަދަލުކޮށްލި އެވެ. ރާއްޖެއަކީ ހޫނު ގައުމަކަށްވުމުން ޔޫކޭގައި ލައިގެން އުޅުނު ފިނި ހެދުމާއި ބޯޓުގައި ހެދުން މަތިން ލައިގެން ހުރި ސުވެޓަރު ފޮރުވި އެވެ. މިއަދަކީ އޭނާއަށް ހާއްސަ ދުވަހެވެ. ސަބަބަކީ ބެތަނީ އަލަތު ކައިވެންޏަށް މިވީ އެންމެ ދެ މަހެވެ. މިއަދު އެ މީހުން ހަނީމޫނަށް މި ޖައްސަނީ ދުނިޔޭގައި އޮތް އެންމެ މަޝްހޫރު ހަނީމޫން މަންޒިލު، ދިވެހިރާއްޖެ އަށެވެ. ވޯލްޑް ޓްރެބަލް އެވޯޑު ފަސް ފަހަރަށް ހޯދާފައިވާ "އެޕަލް" ވަރުގަދަ ބްރޭންޑެއް ކަމަށްވާ "ރާއްޖެ" އަށެވެ. 

ވީއައިއޭގައި އަލަށް ހެދި ޓާމިނަލަށް ބޯޓު ޖައްސައި ފޮރޮޅު ގާނަމުން އައިސް އޭރޯ ބުރިޖުގައި ބޯޓު "ބަނދެލުމާ" އެކު ރީތި ޓާމިނަލް ތެރެއަށް މަތި ބަލަކުން އޭނާ އާއި ފިރިމީހާ ހިނގަމުން ދިޔައީ އެ ބޯޓުން ފޭބި އެހެން މީހުންނެކޭ އެއްފަދައިން ރާއްޖެއާ ވެގެންނެވެ. މިއީ މި ދެމަފިރިން ރާއްޖެއަށް ކުރި ފުރަތަމަ ޒިޔާރަތެވެ.

އިމިގްރޭޝަން ކައުންޓަރު ކައިރިއަށް ގާތްވެލައި ޕާސްޕޯޓް ދިއްކޮށްލުމާއެކު ލިބުނީ ހައިރާން ކަމެކެވެ. އޭނާ ކުރިން ދުވަހު ވެސް ހީނުކުރާ ނަސީބެއް ލައްވައިލީ އެވެ. އޭނާ މި އަހަރު ރާއްޖެ އަށް ޒިޔާރަތް ކުރި ދެ މިލިއަން ވަނަ ޓޫރިސްޓަށް ހޮވުނީ އެވެ. އެ ވަގުތު އެ ސަރަހައްދުގައި ތިބި ވިޒިޓް މޯލްޑިވްސްގެ އޮފިޝަލުން މަރުހަބާ ކިޔެ އެވެ. އަދި މާބޮނޑިއެއް ދިއްކޮށްލި އެވެ. ކަރުގައި ދެ މިލއިަން ވަނަ ޓޫރިސްޓުގެ ލަގަބު އެޅުވި އެވެ. ނަމަވެސް އޭނާއަށް ނޭނގި ގޮތް ކަމަކީ ދެން އޮތް ސަޕްލައިޒް ތަކެވެ. 

ޓާމިނަލުން ބޭރަށް ނުކުތުމާއެކު ބޮޑު ބެރުގެ މަރުހަބާއެއް ކިޔައި ހަތްކޮޅުގައި ބެތަނީ ގެންދިޔައީ ހަފުލާ ބާއްވާ "ވޯޓާ ފްރޮންޓް" ސަރަހައްދަށް ގެންދިޔަ އެވެ. މި ދެމަފިރިންނަށް ހިލޭ ހޮލިޑޭ ވައުޗަރާއި މިނޫން ވެސް ގިނަ ހަނދާނީ ހަދިޔާ ތަކެއް ވަނީ މިތަނުގައި އޮތް ރަސްމިއްޔާތުގައި ދީފަ އެވެ.

ދެ މިލިއަން ވަނަ ޓޫރިސްޓު، ވާހަކަ ދައްކަމުން ބުނީ ރާއްޖެ އައުމުން ކިޔާފައިވާ މަރުހަބާއަށް އުފާކުރާ ކަމަށާ، ގިނަ ސްޕްރައިޒް ތަކެއް ލިބިގެން ދިޔަ ކަމަށެވެ. އަދި ރާއްޖެ އައި ފުރަތަމަ ދަތުރުގައި ދިވެހިން ދިން މެހުމާންދާރީ ދުވަހުވެސް ހަނދާން ނުނެތޭނެ ކަމަށް ވެސް އޭނާ ބުނެފައިވެ އެވެ.

މި ދަތުރުގައި ދެ މިލިއަން ވަނަ ޓޫރިސްޓު މާގިނަ ލަގެޖު ތަކެއް ރާއްޖެއަކަށް ނުގެނެ އެވެ. ގެނައީ އެންމެ ކުޑަ ފޮއްޓެކެވެ. އެ ފޮށީގައި ހުރީ ދެމަފިރިން މޫދަށް އެރޭ ހެދުންކޮޅު އެކަންޏެވެ. ބެތަނީ ބޭނުން ވަނީ ރާއްޖެ އަންނަ ގޮތަށް ގޮސް މޫދުގައި އޮންނާށެވެ. މި ދެ ދެމަފިރިން ރިސޯޓަށްދާ ގޮތަށް ތިބޭނީ ރާއްޖޭގެ ނޫވިލު ކުލައިގެ ރީތި މޫދުގެ އަޑި ބަލާށެވެ. އަދި ކިރު ފޮދެއްފަދަ ރީތި ދޮންވެލިގަނޑު މަތީ ހިތް އުފާކުރާށެވެ.