ކުރީގެ ރައީސުންނަށް ދޭ އޮފީސް ހަރަދު އުނިކޮށް، ކުރީގެ ނައިބު ރައީސުންނަށް އިނާޔަތް ދެނީ

ކުރީގެ ރައީސުންނަށް ދައުލަތުން ކޮންމެ މަހަކު ދޭ އިނާޔަތްތަކުގެ ތެރޭގައި ހިމެނޭ އޮފީސް ހިންގުމުގެ ހަރަދު އުނިކޮށް، ކުރީގެ ނައިބު ރައީސުންނަށް މާލީ އިނާޔަތެއް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައިފި އެވެ.

ސަރުކާރުގެ ފަރާތުން ހުޅުދޫ ދާއިރާގެ ޕީއެންސީ މެމްބަރު މުހައްމަދު ޝާހިދު، ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި އިނާޔަތްތަކާބެހޭ ގާނޫނަށް ހުށަހަޅުއްވާފައިވާ އިސްލާހުގައި ވަނީ، ކުރީގެ ރައީސުންނަށް އޮފީސް ހިންގަން މަހަކު ދޭ 175،000ރ. އުނި ކުރުމަށެވެ.

އަދި ކުރީގެ ރައީސުން ރާއްޖެއިން ބޭރުގައި ދިރިއުޅުއްވާ ނަމަ، ސަލާމަތާއި ރައްކާތެރިކަން ދޭންނުޖެހޭނެ ކަމަށް ބަޔާންކޮށްފައިވާއިރު، ދައުލަތުގެ އެހެން މަގާމެއް ފުރުއްވާ ނަމަ، މަހަކު ދޭ 50،000ރ. ގެ މާލީ އިނާޔަތް ދޭންނުޖެހޭ ގޮތަށް ގާނޫނު އިސްލާހުކުރަން ޝާހިދު ވަނީ ހުށަހަޅުއްވައިފަ އެވެ.

ކުރީގެ ރައީސުންނަށް ލިބޭ ބައެއް އިނާޔަތްތައް ކަނޑައިލުމުގެ އިތުރުން، ނައިބު ރައީސްކަން ކުރައްވާފައިވާ ބޭފުޅުންނަށް މަހަކު 25،000ރ. ދިނުމަށް އެ ބިލުގައި ހިމަނާފައި ވެ އެވެ.

އޭގެ އިތުރުން، ނައިބު ރައީސްކަން ކޮށްފައިވާ ބޭފުޅުންނަށް ރާއްޖެ އާއި ރާއްޖެއިން ބޭރުން ބޭސް ފަރުވާ ހަމަޖައްސައިދޭން ޖެހޭނެ ކަމަށް ވެސް މަޖިލީހަށް ހުށަހަޅާފައިވާ ބިލުގައި ބުނެފައި ވެ އެވެ.

ކުރީގެ ރައީސުންގެ އިނާޔަތްތަކަށް ގެންނަ ބަދަލުތަކުގެ ސަބަބުން އަހަރަކު، 10.5 މިލިއަން ރުފިޔާ ދައުލަތަށް ސަލާމަތްވާނެ ކަމަށް ޝާހިދު ވިދާޅުވެފައި ވެ އެވެ. ނަމަވެސް، ކުރީގެ ނައިބު ރައީސުންނަށް އިނާޔަތް ދޭން ފެށުމުން އެކަމަށް 300،000ރ. ހަރަދުވާނެ ކަމަށް އޭނާ ވިދާޅުވެ އެވެ. އަދި ނައިބު ރައީސުންގެ ބޭސް ފަރުވާގެ ހަރަދަށް 700،000ރ. ހަރަދުވާނެ ކަމަށް ވެސް ލަފާކުރައްވާފައި ވެ އެވެ.