ތިންވަނަ ކުއާޓަރު | އެޗްޑީއެފްސީގެ ސާފު ފައިދާ ބޮޑުތަނުން މައްޗަށް

މި އަހަރުގެ ނިމިދިޔަ ތިންވަނަ ކުއާޓަރުގައި ހައުސިން ޑިވްލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) ގެ ސާފު ފައިދާ ބޮޑުތަނުން މައްޗަށް ޖައްސައިފި އެވެ. 

އެޗްޑީއެފްސީގެ ތިންވަނަ ކުއާޓަރުގެ މާލީ ރިޕޯޓް ދައްކާ ގޮތުން އެ ކުންފުންޏަށް ތިންވަނަ ކުއާޓަރުގައި ވަނީ ޖުމްލަ އާމްދަނީގެ ގޮތުގައި 56.1 މިލިއަން ރުފިޔާ ލިބިފަ އެވެ. މިއީ މިދިޔަ ދެވަނަ ކުއާޓަރާ އަޅާބަލާއިރު ގާތްގަނޑަކަށް އެއްވަރު އަދަދެއް ނަމަވެސް އެ ކުންފުނީގެ ހަރަދު  ކުޑަކުރުމާއި އެފިޝަންސީއަށް ކޮށްފައިވާ މަސައްކަތުގެ ނަތީޖާއެއްގެ ގޮތުން ކުންފުނީގެ ސާފު ފައިދާ ވަނީ މައްޗަށް ޖައްސާފަ އެވެ. 

އެ ކުންފުނިން ހަރަދު ކުޑަކޮށްފައިވާކަން އެނގެނީ މިދިޔަ ދެވަނަ ކުއާޓަރުގައި ޖުމްލަ އެކްސްޕެންސް 30 މިލިއަން ރުފިޔާގައި ހުރިނަމަވެސް ތިންވަނަ ކުއާޓަރުގައި މި އަދަދު 21.7 މިލިއަން ރުފިޔާއަށް ދަށްކޮށްފައިވާތީ އެވެ. 

މި އަހަރުގެ ދެވަނަ ކުއާޓަރުގައި އެޗްޑީއެފްސީއަށް ސާފު ފައިދާއަށް ލިބިފައިވަނީ 25.8 މިލިއަން ރުފިޔާ އެވެ. ނަމަވެސް ތިންވަނަ ކުއާޓަރުގައި މި އަދަދު ވަނީ 34.4 މިލިއަން ރުފިޔާ ނުވަތަ ހަތް ޕަސެންޓުގެ ކުރިއެރުމެއް ހޯދާފަ އެވެ. 

އެޗްޑީއެފްސީ މިހާތަނަށް ތިން ސްކޫކް އާއި ދެ ބޮންޑެއް ވިއްކާފައިވެ އެވެ. މި ފައިނޭންޝަލް އިންސްޓްރޫމަންޓްތަކަށް ގިނަ ބައެއްގެ ޝައުގުވެރިކަން ލިބިފައިވާކަން މާލީ ރިޕޯޓުން އެނގެ އެވެ. މިގޮތުން މިހާތަނަށް ސުކޫކާއި ބޮންޑުތައް ވިއްކައިގެން ޖުމްލަ 545 މިިލިއަން ރުފިޔާ ލިބިފައިވެ އެވެ. އަދި އެ ހުރިހާ ފައިސާއެއް ވަނީ ހައުސިން މޯގޭޖް ފައިނޭންސް ވަސީލަތްތަަކަށް ހަރަދުކޮށްފަ އެވެ. 

އެޗްޑީއެފްސީގެ މާލީ ރިޕޯޓުގައިވާ ގޮތުން އެ ކުންފުނީގެ އިސްލާމިކް ވިންޑޯ އާމްނާއަށް އޮތް އިތުބާރުވެސް ވަނީ އިތުރުވެގެން ގޮސްފަ އެވެ. ތިންވަނަ ކުއާޓަރުގެ ނިޔަލަށް އެޗްޑީއެފްސީ އަމްދާއަށް ޖުމްލަ އާމްދަނީގެ ގޮތުގައި 22.8 މިލިއަން ރުފިޔާ ލިބިފައިވެ އެވެ. މި ބައިގެ ސާފު ފައިދާ ވެސް ވަނީ ދެވަނަ ކުއާޓަރަށްވުރެ އިތުރުވެފަ އެވެ. މި އަހަރުގެ ދެވަނަ ކުއާޓަރުގައި ސާފު ފައިދާ ހުރީ 11.5 މިލިއަން ރުފިޔާގަ އެވެ. ނަމަވެސް ތިންވަނަ ކުއާޓަރުގައި މި އަދަދު ވަނީ 15.8 މިލިއަން ރުފިޔާއަށް އިތުރުވެފަ އެވެ.