އެމެރިކާއިން ވެނެޒުއޭލާ އަށް އަރައިގަންނާނެކަން ޔަގީން ވެއްޖެ

ކެރީބިއަން ސަރަހައްދަށް ގިނަ އަދަދެއްގެ ހަތިޔާރު ޖަމާކޮށް ހަނގުރާމައަށް ތައްޔާރުވަމުންދާ އެމެރިކާއިން ވެނެޒުއޭލާއަށް އަރައިގަންނާނެކަން ޔަގީންވެފައިވާއިރު، ހަނގުރާމައިގެ ބެރުތަކުގެ އަޑުގަދަ ވެއްޖެ އެވެ. 

އެމެރިކާއާ އަބަދު ވެސް ބަހުގެ ހޫނުހަމަލާތަކެއް ބަދަލުކުރާ ވެނެޒުއޭލާގެ ރައީސް ނިކޮލަސް މަޑޫރޯގެ ވެރިކަން ބަދަލު ކުރަން އެމެރިކާ ސަރުކާރުން ހިންގަން އުޅޭ އޮޕަރޭޝަންގެ ސީދާ މައުލޫމާތެއް އެ ގައުމުން ހާމަކޮށްފައެއް ނުވެ އެވެ. ނަމަވެސް ދެކުނު އެމެރިކާ ހިމެނޭ ކެރީބިއަން ރީޖަންއަށް ގިނަ އަދަދެއްގެ ހަތިޔާރު ޖަމާކުރާތާ ލައްކަ ދުވަސް ވަނީ ވެފަ އެވެ.


ބަރު ހަތިޔާރުތައް ވެނެޒުރޭލާ ކައިއަށް ޖަމާ ކުރަމުންދާ ސަބަބެއްގެ ގޮތުގައި އެމެރިކާއިން ބުނެފައިވަނީ ވެނެޒުއޭލާއާ ގުޅުންހުރި ޑްރަގް ޓްރެފިކް ކުރާ ކަމަށް ތުހުމަތުކުރެވޭ ބޯޓުފަހަރަށް ހަމަލާދިނުމަށެވެ. މިގޮތުން ސެޕްޓެމްބަރު މަހުން ފެށިގެން މިފަދަ ހަމަލާތަކުގައި ގާތްގަނޑަކަށް 80 އަށް ވުރެ ގިނަ މީހުން މަރުވެފައިވާ ކަމަށް ރިޕޯޓްތައް ބުނެއެވެ.

ނަމަވެސް މިއީ މި ބޮޑު ހަރަދުގެ ހަގީގީ ސަބަބު ނޫންކަން ހާމަވެގެން ގޮސްފައިވަނީ ރައީސް ޑޮނަލްޑް ޓްރަމްޕް މިދިޔަ ހަފްތާގައި ވައިޓް ހައުސްގައި ބޭއްވި ނޫސްވެރިންގެ ބައްދަލުވުމެއްގައި ވެނެޒުއޭލާގެ މައްސަލާގައި އަމަލުކުރާނެ ގޮތެއް ކަނޑައަޅުއްވައިފި ކަމަށް އިޝާރާތްކުރައްވާފަ އެވެ.

އެމެރިކާގެ ވައިޓް ހައުސް އެތެރެ ކޮއިލުގެ ހަބަރުތައް އެންމެ ތަފުސީލުކޮށް ގެނެސްދޭ ސީއެންއެން. އަށް މައުލޫމާތުދިން ހަތަރު މަސްދަރަކުން ބުނި ގޮތުގައި ވެނެޒުއޭލާގެ ރައީސް ނިކޮލާސް މަދޫރޯގެ ވެރިކަން ނިމުމަކަށް ގެނައުމަށްޓަކައި އޮޕަރޭޝަނެއް ފެށުމަށް ކަންކުރާނެ ގޮތުގެ ބައެއް ލަފާ ވަނީ ހިއްސާކޮށްފަ އެވެ. މިހާތަނަށް އެނގިފައިވާ މައުލޫމާތުތަކުން އެނގޭ ގޮތުގައި
"އޮޕަރޭޝަން ސަދަން ސްޕިއާ" ގެ ނަން ދީފައިވާ މި އޮޕަރޭޝަން ކުރިއަށް ގެންދަން ގާތްގަނޑަކަށް 200,000 ސިފައިން ވަނީ އެ ސަރަހައްދަށް ގެންގޮސްފަ އެވެ.