ޗައިނާއިން ބޮޑު ކުރިއެރުމެއް | ޖުމްލަ އަދަދު 300،000 އަށްވުރެ މައްޗަށް

ރާއްޖެ އަންނަ ޗައިނާ ޓޫރިސްޓުންގެ އަދަދު އިތުރުވެ، މި އަހަރު މިހާތަނަށް އެ ގައުމުން އައި ޖުމްލަ ޓޫރިސްޓުންގެ އަދަދު 300،000 އަށްވުރެ މަތިވެއްޖެ އެވެ. 

ޓޫރިޒަމް މިނިސްޓްރީން ބުނި ގޮތުގައި އިއްޔެ ނިޔަލަށް ޗައިނާއިން ރާއްޖެއަށް ވަނީ 300,352 ޓޫރިސްޓުން އައިސްފަ އެވެ. އަދި މިހާރު އެ ގައުމުން ރާއްޖޭގެ ޓޫރިޒަމްގެ 15.8 ޕަސެންޓް ހިއްސާ ކުރާ ކަމަށް ތަފާސް ހިސާބުތަކުން ދައްކަ އެވެ. އަދި މިދިޔަ އަހަރެކޭ އެއްގޮތަށް މި އަހަރުވެސް ޗައިނާ ހިމެނިފައިވަނީ ރާއްޖެއަށް އެންމެ ގިނައިން ޓޫރިސްޓުން އައި ގައުމަށެވެ. 

ޗައިނާގެ އިތުރުން ދެން އެންމެ ގިނައިން ޓޫރިސްޓުން އައިސްފައިވަނީ ރަޝިއާއިންނެވެ. އެ ގައުމުން މިހާތަނަށް 239,004 ޓޫރިސްޓުން ވަނީ ޒިޔާރަތްކޮށްފަ އެވެ. އަދި ތިންވަނާގައި އުޅެނީ ޔޫކޭ އެވެ. އެ ގައުމުން 168,597 ޓޫރިސްޓުން ޒިޔާރަތް ކުރި ކަމަށް ދައްކަ އެވެ. 

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން މި އަހަރުގެ މިހާތަނަށް ބަލާއިރު ޖުމުލަ 1,897,840 ޓޫރިސްޓުން އައިސްފައިވެ އެވެ. މިދިޔަ އަހަރު އައިސްފައިވަނީ 1,728,045 ޓޫރިސްޓުންނެވެ. އެހެންވެ މިއީ 9.8 ޕަސެންޓުގެ އިތުރުވުމެކެވެ. އަދި މިމަހުގެ މިހާތަނަށް ބަލާއިރު އެވްރެޖުކޮށް މިހާރު އަންނަނީ 6,446 ޓޫރިސްޓުންނެވެ. 

ސަރުކާރުން ވަނީ މި އަހަރު ރާއްޖެއަށް ޖުމްލަ 2.2 މިލިއަން ޓޫރިސްޓުން އަންނާނެ ކަމަށް އަންދާޒާކޮށްފަ އެވެ. މިދިޔަ އަހަރު ރާއްޖެއަށް އައިސްފައިވަނީ ދެ މިލިއަން ޓޫރިސްޓުންނެވެ.