ވޯލްޑް ކަލިނަރީ އެވޯޑް | އިންޑިއާ ކަނޑުގެ ލޭންޑްމާކް ރެސްޓޯރެންޓަކަށް ސިންފަނި

ވޯލްޑް ޓްރެވަލް އެވޯޑުގައި ހިމެނޭ، ވޯލްޑް ކަލިނަރީ އެވޯޑުގެ ބައިން، ރާއްޖެއަށް އެއްވަނަ ލިބުނުއިރު، މި ސަރަހައްދުގެ އެންމެ ފުރިހަމަ ރެސްޓޯރެންޓުގެ އެވޯޑު ރާއްޖޭގެ ސިންފަނި ރެސްޓޯރެންޓަށް ލިބިއްޖެ އެވެ. 

ވޯލްޑް ކަލިނަރީ އެވޯޑްސް 2025ގައި ރާއްޖެއަށް ރަންވަނަ ލިބިފައިވަނީ ޖަރުމަނުވިލާތާއި ޕެރޫ ސޭޝެސްލް އަދި ސިންގަޕޫރާ ވާދަކޮށްގެންވެ. މިއަހަރުގެ އެވޯޑުގެ އެންމެ ފަހުރުވެރި އެއް މަގާމު ކަމަށްވާ ދުނިޭގެ އެންމެ މަގުބޫލު ސަގާފީ ކެއުމުގެ މަންޒިލްގެ ގޮތުގައި ރާއްޖެ ހޮވުނުއިރު، ސިންފަނީ ރެސްޓޯރަންޓް ވަނީ "އިންޑިއަން އޯޝަންސް ބެސްޓް ލޭންޑްމާކް ރެސްޓޯރަންޓް" ގެ އެވޯޑު ވެސް ހޯދާފަ އެވެ.

މި އެވޯޑާ ބެހޭ ގޮތުން، ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި އެމްޑީ އިބްރާހިމް ޝިއުރީ ވިދާޅުވި ގޮތުގައި، މި ޝަރަފުތަކަކީ ރާއްޖޭގެ މުއްސަނދި ސަގާފަތާއި ކެއިންބުއިމުގެ އުކުޅުތަކާއި ރަހަތަކަކީ މުޅި ދުނިޔެވެސް ބަލައިގަންނަ ފުރިހަމަ ރަހަތަކެއްކަން ދައްކުވާދޭ އަގުހުރި ރަމްޒެއް ކަމަށެވެ.

"ސަގާފީ ކެއުންތަކާއެކު، ޒަމާނީ ކެއިންބުއިމުގައި ދުނިޔޭގެ ފެންވަރުގެ މަންޒިލެއްގެ ގޮތުގައި ރާއްޖެ ހިމެނިގެން ދިއުން މިއީ ފަތުރުވެރިކަމުގެ ސިނާއަތުގެ އިތުރުން އަޅުގަނޑުމެންގެ ދިވެހިވަންތަކަމާއި ގައުމީ ފަހުރުކަމަށްވާ މަސްވެރިކަމާއި ކަނޑުގެ ރޯއްޖާ ދިވެހީންގެ ދިރިއުޅުން ގުޅި ލާމެހިފައިވާ މިންވަރު މުޅި ދުނިޔެއަށް ދައްކާލަދިނުމަށް ލިބޭ ވަރަށް ބޮޑު ހިތްވަރެއް،" ޝިއުރީ ވިދާޅުވި އެވެ. 

ރާއްޖެ ވަނީ އިންޑިއާކަނޑުގެ ސަރަހައްދުން ވެސް ތަފާތު ގިނަ އެވޯޑު ތަކެއް ވެސް ހޯދާފަ އެވެ. އެގޮތުން ވެރިރަށް މާލެ ވަނީ "އިންޑިއަން އޯޝްންސް ބެސްޓް ކަލިނަރީ ސިޓީ ޑެސްޓިނޭޝަން" ގެ މަގާމު ހޯދާފަ އެވެ. އަދި، ގައުމީ ޔުނިވާސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް ވަނީ މި ސަރަހައްދުގެ އެންމެ މޮޅު ކަލިނަރީ ޓްރެއިނިންގް އިންސްޓިޓިއުޓުގެ މަގާމުވެސް ހޯދާފަ އެވެ.

ވޯލްޑް ޓްރެވަލް އެވޯޑްސްގައި މިއަހަރު ވެސް ރާއްޖެ އަންނަނީ ދުނިޔޭގެ އެންމެ މަގުބޫލު ފަތުރުވެރިކަމުގެ މަންޒިލްގެ މަގާމު ވިދިވިދިގެން ހަވަނަ ފަހަރަށް ދިފާއުކުރުމަށް މަސައްކަތް ކުރަމުންނެވެ. މީގެ އިތުރުން ވޯލްޑްސް ލީޑީންގް ގްރީން ޑެސްޓިނޭޝަންގެ މަގާމުވެސް ދެވަނަ ފަހަރަށް ދިފާޢުކުރުމަށް ރާޢްޖެއިން މިހާރު އަންނަނީ މަސައްކަތް ކުރަމުންނެވެ.