"ގުރައިދޫ ރައްޔިތުން އެންމެ ބޭނުންވަނީ މި ދައުރުގައި އެއާޕޯޓް ނިންމަން"
ގުރައިދޫ ރައްޔިތުން އެދުނީ ރަށުގެ މަގުތައް ޒަމާނީ ފެންވަރަކަށް ހެދުމާއި ހޮސްޕިޓަލް ތަރައްގީ ކުރުން އަދި އެއާޕޯޓް މި ދައުރުގައި ނިންމުމެވެ.
ތ. ގުރައިދޫގައި މިއަދު ބިންގާ އެޅި ޑޮމެސްޓިކް އެއާޕޯޓް ނިންމައި ހުޅުވުމަކީ ރައްޔިތުންގެ އެންމެ ބޮޑު އެދުން ކަމަށް ކައުންސިލްގެ ރައީސް ތައުފީގު އަލީ ވިދާޅުވެއްޖެ އެވެ.
ތ. އަތޮޅުގައި ސަރުކާރުން ތަރައްގީ ކުރާ ތިން ވަނަ އެއާޕޯޓުގެ ގޮތުގައި ބިންގާ އެޅި ގުރައިދޫ އެއާޕޯޓް މަޝްރޫއާ ބެހޭ ގޮތުން ކައުންސިލްގެ ރައީސް ތައުފީގު އަލީ ވިދާޅުވީ ރައްޔިތުންނާއެކު ބައްދަލުވުމަށްފަހު ތިން ކަމެއް ރައީސަށް ހުށަހަޅަން ނިންމި އެވެ. މި ކަންތައްތަކަކީ ރަށުގެ މަގުތައް ޒަމާނީ ފެންވަރަކަށް ހެދުމާއި ހޮސްޕިޓަލް ތަރައްގީ ކުރުން އަދި އެއާޕޯޓް މި ދައުރުގައި ނިންމުމެވެ.
"މީގެ ތެރޭން މި ދައުރުގެ ތެރޭގައި އެއާޕޯޓުގެ މަސައްކަތް ނިންމައި ހިދުމަތް ފައްޓަވައި ދެއްވުން އެއީ އަޅުގަނޑުމެންގެ އެދުން. އެންމެ ބޮޑު އެދުން. މީގެ އިތުރުން ރަށުގެ ބިނާވެށި ޕްލޭނަށް ހަތް ހެކްޓަރު އިތުރުކޮަށް ދިނުން. އަދި އަލަށް އާބާދުވާ ސަރަހައްދަށް ކަރަންޓާއި މީރުފެން ލިބޭނެ ގޮތް ހަމަޖައްސަވައި ދެއްވުން،" ރައީސް ވިދާޅުވި އެވެ.
ގުރައިދޫއަށް ސަރުކާރުން އިތުރު ކަންތައްތަކެއް ކޮށްދެއްވަން ރައީސް ޑރ. މުހައްމަދު މުއިއްޒު ވަނީ ވައުދުވެވަޑައިގެންފަ އެވެ. އެ ވައުދުގެ ތެރޭގައި ހިމެނެނީ ޒަމާނީ ފުޓުބޯޅަ ދަނޑެއް ހެދުމާއި ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތް ފެށުން އަދި ގުރައިދޫގެ ކުޑަކުދިންގެ ޕާކުގެ މި އަހަރު ނިންމުމުގެ އިތުރުން އައިޑީ ކާޑާއި ޕާސްޕޯޓު ދޫކުރުމުގެ ކަންކަން މި އަހަރުގެ ނޮވެމްބަރުމަހު ފެށުމެވެ.
ކޮމެންޓް
Republic of Maldives