ރާއްޖޭގެ ރިސޯޓް ހަދާ ދަމަކް ކުންފުނި ޓޫރިސްޓުން އުފުލަން އެއާލައިނެއް

ރާއްޖޭގައި އަލަށް ހަދާ އެންމެ މަތީ ފަންތީގެ އެއް ރިސޯޓު ކަމަށްވާ މެންޑަރިން އޮރިއެންޓަލްގެ މަސައްކަތް ދަނީ ހަލުއިކޮށް ނިމެނުންނެވެ. ރާއްޖޭގެ އައިމާ ކުންފުންޏާ ހަވާލުކޮށްގެން މާލެ އަތޮޅު ބޮލިދުއްފަރުގައި މި ރިސޯޓް ތަރައްގީ ކުރަނީ ދުނިޔޭގެ މަޝްހޫރު ލަގްޒަރީ ރިއަލް އެސްޓޭޓް ޑިވެލޮޕަރުންގެ ތެރޭގައި ހިމެނޭ ދުބާއީގެ ދަމަކް ގްރޫޕުންނެވެ. އެ ގްރޫޕުން ވަނީ އެ ކުންފުނީގެ ޓޫރިސްޓް ޕްރޮޕަޓީތަކަށް ޓޫރިސްޓުން އުފުލަން އެއާލައިނެއް ފަށަން އުޅޭކަން އިއުލާނުކޮށްފަ އެވެ. 

ދަމަކް ކުންފުނިން ބުނެފައިވާ ގޮތުގައި ދަމަކް އެއާގެ ނަމުގައި ފަށާ މި އެއާލައިން ކުރިއަށް އޮތް ހަ ދުވަހުގެ ތެރޭގައި އިފުތިތާހު ކުރާނެ އެވެ. މި އެއާލައިންވާނީ އެ ކުންފުނީގެ މަތީ ފަންތީގެ ޓޫރިސްޓުންނަށް ހިދުމަތްދެވޭނެ ލަގްޒަރީ އެއާލައިނަކަށެވެ. 

ދަމަކް އެއާގެ ދަތުރުތައް ހަ މަންޒިލަކަށް ކުރާނެ އެވެ. މި އެއާލައިން ދަތުރު ކުރާނީ އިންޑޮނޭޝިއާގެ ބާލީ އާއި ރާއްޖެ އަދި ހަވާއީ ސީޝެލްސް އަދި ފިޖީގެ އިތުރުން ބޯރާބޯރާ އަށެވެ. 

އައިމާ ކުންފުންޏާ ހަވާލުކޮށްގެން ދަމަކް ކުންފުނިން ތަރައްގީކުރާ  މެންޑަރިން އޮރިއެންޓަލްއަކީ 148 މިލިއަން ޑޮލަރު (2.2 ބިލިއަން ރުފިޔާ) ގެ އިންވެސްޓްމަންޓެކެވެ. މާލެ އަތޮޅުގެ ހުޅަނގު ދެކުނުގައި އޮންނަ 34 ހެކްޓަރުގެ ބޮޑު ރަށެކެވެ. މި ރިސޯޓުގައި ތިން ރަށް ހިމެނެ އެވެ. މި ތަނުގައި ޖުމްލަ 120 ކޮޓަރި ހުންނާނެ އެވެ. މި ރިސޯޓު އަންނަ އަހަރު ހުޅުވާނެ އެވެ. މި ރިސޯޓުގައި 56 އޯވާ ވޯޓާ ވިލާ އާއި 64 ބީޗް ފްރޮންޓް ވިލާ ހުންނާނެ އެވެ. މީގެ އިތުރުން މި ތަނުގައި މެޑަރިން އޮރިއެންޓަލްގެ އައިކޮނިކް 10 ރެސިޑެންސް ވެސް ހިމެނެ އެވެ.