ހަނިމާދޫ އެއާޕޯޓު ނިމެންވާއިރަށް ހދ.ގައި ފަތުރުވެރިކަމުގެ 4،000 އެނދު ގާއިމުކުރަނީ

ހދ.ހަނިމާދޫ ބައިނަލްއަގުވާމީ އެއާޕޯޓުގެ މަސައްކަތް ނިމެންވާއިރަށް އެ އަތޮޅުގައި 4،000 އެނދު ގާއިމުކުރުމުގެ މަސައްކަަތް ސަރުކާރުން ކުރަމުންދާކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ. 

ރައްޔިތުންގެ މަޖިލީހުގެ ހދ.ވައިކަރަދޫ ދާއިރާގެ މެންބަރު ހުސައިން ޒިޔާދު ކުރެއްވި ސުވާލަކަށް ޖަވާބުދެއްވަމުން ފައިސަލް ވިދާޅުވީ ހދ. އަތޮޅުގައި ޓޫރިޒަމް ތަރައްގީކުރުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވައުދުފުޅެއް ކަމަށެވެ. އަދި އޭނާ މަގާމާ ހަވާލުވެވަޑައިގެންނެވިފަހުން އެންމެ ފުރަތަމަ ފަހަރަށް ފަތުރުވެރިކަމަށް ދޫކުރަން އިއުލާނުކުރި ރަށްތަކުގެ ތެރޭގައި ހދ.ވައިކަރަމުރައިދޫގެ 15 ހެކްޓަރު ހިމެނޭކަމަށާއި، މިހާރު އެރަށް ބަޔަކަށް އެވޯޑުކުރެވި އެއްބަސްވުމުގައި ސޮއިވެސް ކުރެވިފައިވާ ކަމަށް ފައިސަލް ވިދާޅުވި އެވެ. 

އިތުރަށް ފައިސަލް ވިދާޅުވީ އެ އަތޮޅުގެ އިތުރު ތިން ތަނެއް ފަތުރުވެރިކަމުގެ ބޭނުމަށް ދޫކުރެވިފައިވާ ކަމަށެވެ. އަދި ޖުމްލަ 1،886 އެނދު ގާއިމުކުރުމުގެ މަސައްކަތް މިހާރު ފެށިފައިވާ ކަމަށެވެ. 

އިތުރަށް ފައިސަލް ވިދާޅުވީ އިންޑިޔާގެ އެގްޒިމް ބޭންކުގެ އެހީގައި ހަނިމާދޫ އެއާޕޯޓު ތަރައްގީކުރަމުންދާ މަޝްރޫއަކީ އަތޮޅުގެ ކަނެކްޓިވިޓީ އިތުރުވާނެ ކަމެއް ކަމަށާއި، އަންނަ އަހަރުގެ މާޗު މަހުގެ ނިޔަލަށް އެއާޕޯޓުގެ މަސައްކަތް އެކީ ނިމޭނެކަމަށް ލަފާކުރެވޭ ކަމަށެވެ. އަދި އެއާޕޯޓުގެ މަސައްކަތް ނިމެންވާއިރަށް ރައީސް މުއިއްޒުގެ އިރުޝާދުގެ ދަށުން ހދ.ގައި އެކަށީގެންވާ އަދަދަކަށް އެނދު ގާއިމުކުރުމަށް ޓޫރިޒަމް މިނިސްޓްރީން މަސައްކަތްތަކެއް ކުރަމުން އަންނަ ކަމަށެވެ.

އެގޮތުން ރައީސް ދުބާއީއަށް ކުރެއްވި ދަތުރުފުޅުގައި ކުރިއަށްގެންދިޔަ އިންވެސްޓުމެންޓު ފޯރަމުގައި ހދ.އަތޮޅުގައި ޓޫރިޒަމް ދާއިރާ ތަރައްގީކުރަން އެކަށީގެންވާ ރަށްތައް ފާހަގަކޮށް އެ ރަށްތަކުގެ މައުލޫމާތު އިންވެސްޓަރުންނާ ހިއްސާކުރެވުނުކަމަށާއި، ދާދިފަހުން ރައީސް އިންޑިޔާއަށް ކުރެއްވި ފުރަމާނަ ދަތުރުފުޅުގައިވެސް އެ ރަށްތަކުގެ މައުލޫމާތު އިންޑިޔާގެ ވިޔަފާރިތަކާ ހިއްސާކުރެވިފައިވާކަމަށް ފައިސަލް ވިދާޅުވި އެވެ. 

ރައީސް ފަތުރުވެރިކަމުގެ ދާއިރާއިން ވެވަޑައިގެންފައިވާ ވައުދުފުޅުތަކަކީ ފަތުރުވެރިކަން ނެތް ސަރަހައްދުތަކަށް ފަތުރުވެރިކަން ފުޅާކުރުމާ ގުޅުންހުރި ވައުދުތަކެއްކަން ފާހަގަކުރައްވައި ފައިސަލް ވިދާޅުވީ އަންނަ އަހަރުގެ ފުރަތަމަ ކުއާޓާއާއި ދެވަނަ ކުއާޓާގައި އިންޑިޔާއާއި ސިންގަޕޫރާއި ތަައިލޭންޑުގައި ފަތުރުވެރިކަމަށް ހާއްސަ އިންވެސްޓުމެންޓު ފޯރަމްތަކެއް ބޭއްވުމަށް ޓޫރިޒަމް މިނިސްޓްރީން ނިންމައި ތާވަލުކޮށްފައިވާ ކަމަށެވެ. 

"ހަނިމާދޫއަށް އިންޓަނޭޝަނަލް އެއާޕޯޓު ނިމުމަކީ ހދ.އަތޮޅުގެ ކަނެކްޓިވިޓީއަށް ލިބޭ ވަރަށް ބޮޑަށް ކުރިއެރުމެއް. އެހެންވީމާ އެއާޕޯޓު ނިމެންވާއިރަށް އެތަނަށް 4،000 ވަރަކަށް އެނދު ގެނައުމުގެ މަސައްކަތް އަޅުގަނޑުމެން މިދަނީ ކުރަމުން،" ފައިސަލް ވިދާޅުވި އެވެ. 

އިންވެސްޓުމެންޓު ފޯރަމްތަކުގައި ރާއްޖޭގައި ހުރި އިންވެސްޓުމެންޓު ފުރުސަތުތަކާ ގުޅޭ މައުލޫމާތުތަކާއި، ރާއްޖޭގައި އިންވެސްޓުމެންޓުކޮށްފައިވާ ފަރާތްތަކުގެ ތަޖުރިބާތައް ހިއްސާކުރެވުމުން، އަދި ޓާގެޓެޑް މަޝްރޫއުތަކެއް ގެންގޮސްގެން ހދ.އަތޮޅު ފަދަ ފަތުރުވެރިކަން ނެތް ސަރަހައްދުތަކަށް ފަތުރުވެރިކަން ގެނައުމަށް މަގުފަހިވާނެ ކަމަށް ގަބޫލުކުރައްވާ ކަމުގައި ފައިސަލް ވިދާޅުވި އެވެ.