"ރައީސް ޓޫރިޒަމްގެ ކަންބޮޑުވުންތައް އަޑުއައްސަވައި ހައްލު ހޯއްދަވައިދެއްވާނެ"

ދައުލަތުގެ ހާލަތު ހުރި ގޮތުން އެވަގުތެއްގައި ނިންމަަވަންޖެހޭ ކަންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމެވި ނަމަވެސް ފަތުރުވެރިކަމުގެ ސިނާއަތުގެ ވިޔަފާރިތަކުގެ އަޑުއައްސަވައި، ކަންބޮޑުވުންތަކަށް ހައްލު ހޯދައިދެއްވާނެ ކަމުގައި ފައިސަލް ވިދާޅުވެއްޖެ އެވެ. 

އިއްޔެ ބޭއްވި ޓޫރިޒަމް ދާއިރާގެ ސިމްޕޯޒިއަމްގައި ވާހަކަދައްކަވަމުން ފައިސަލް ވިދާޅުވީ ސަަރުކާރުގެ ސިޔާސަތަކީ ފަތުރުވެރިކަމުގެ ސިނާއަތުގެ ކަންކަމުގައި އެ ދާއިރާގައި ހަރަކާތްތެރިވާ އެންމެންވެސް ޝާމިކޮށްގެން ކުރިއަށްދިއުން ކަމަށެވެ. އެކަމުގެ ހެއްކެއްގެ ގޮތުގައި އޭނާ ފާހަގަކުރެއްވީ މީގެ ކުރިން އެމްއެމްޕީއާރުސީ ބޯޑުގައި ގެސްޓުހައުސްތައް ތަމްސީލުނުކުރި ނަމަވެސް މިހާރު އެ ކުންފުނީގެ ބޯޑުގައި ގެސްޓުހައުސްތައް ތަމްސީލު ކުރައްވާ ބޭފުޅަކަށްވެސް ޖާގަ ދީފައިވުމެވެ. 

"މީގެ ކުރިން ނުކުރާ ކަމެއް، ގެސްޓު ހައުސް އެސީސިއޭޝަނަކުން އެމްއެމްޕީއާރުސީ ބޯޑަކު ރިޕްރެޒެންޓެއް ނުކުރާނެ. އެކަމަކު އެ ފުރުސަތު އަޅުގަނޑުމެން ދީފިން. އެއިން އެނގޭ ކަމަކީ އަޅުގަނޑުމެން މިތިބީ ހަމަ އެންމެން ބައިވެރިކޮށްގެން މިކަން ކުރަންކަން،" ފައިސަލް ވިދާޅުވި އެވެ. 

އެއާއެކު ފައިސަލް ފާހަގަކުރެއްވީ ރިސޯޓު އޯނަރުންގެ ޖަމްއިއްޔާ މަޓީއާއެކު ކުރިމަތިވާ ހުރިހާ ކަމެއްގައި ސަރުކާރުން މަޝްވަރާކޮށް ވާހަކަދައްކަމުންދާ ކަމެވެ. ނަމަވެސް ދައުލަތުގެ ހާލަތު އޮތް ގޮތަށް ރިއާޔަތްކޮށް އެންމެން ހިތްހަމަނުޖެހޭ ނިންމުންތައް ސަރުކާރަށް ނިންމަން މަޖުބޫރުވާކަމަށްވެސް މިނިސްޓަރު ވިދާޅުވި އެވެ. 

މިފަހުން މަޓީން އެންމެ ބޮޑަށް ހިތްހަމަނުޖެހުން ފާޅުކުރީ ޓޫރިޒަމް ވިޔަފާރިތަކަށް ބޭރު ފައިސާއިން ލިބޭ އާމްދަނީގެ ބައެއް ބޭންކުތަކަށް މާރުކުރަން މޯލްޑިވްސް މަނިޓަަރީ އޮތޯރިޓީން ނިންމުމުންނެވެ. އަދި މިހާރު ސަރުކާރުގެ ފަރާތުން މަޖިލީހަށް ހުށަހަޅާފައިވާ ޓޫރިޒަމް ދާއިރާއާ ގުޅުންހުރި ތިން ޓެކުހެއް ބޮޑުކުރުމުގެ ބިލުތަކާމެދުވެސް އެ ސިނާއަތުގައި ހިޔާލު ތަފާތުވުންތައް އެބަހުއްޓެވެ. 

ފައިސަލް ވިދާޅުވީ ގައުމުގެ ހާލަތު އޮތް ގޮތުން އެންމެ ހިތްހަމަނުޖެހޭ ކަހަލަ ނިންމުންތައް ނިންމަވަންޖެހިވަޑައިގަތުމުން އެފަދަ ނިންމެވުންތައްވެސް ރައީސް މުއިއްޒު ނިންމަވާނެ ކަމަށެވެ. ނަމަވެސް އެ ނިންމެވުންތަކާ ގުޅޭ ގޮތުން ހުރި ކަންބޮޑުވުންތައް އެމަނިކުފާނު އަޑުއައްސަވައި އެކަންކަމަށް ރިއާޔަތްކުރައްވައި ހައްލުތަކެއް ހޯދައިދެއްވާނެ ކަމުގައިވެސް ފައިސަލް ވިދާޅުވި އެވެ. 

"ދައުލަތުން ބައެއްފަހަރު އެވަގުތު ދައުލަތުގެ ހާލަތު ހުންނަ ގޮތުން އަޅުގަނޑުމެން ޖެހޭ އެންމެން އަދި އެންމެ ހިތްހަމަނުޖެހޭ ކަހަލަ ޑިޒިޝަންތައް ނަގަން. އެގޮތަށް ނަގަންޖެހޭ ޑިޒިޝަނެއް ދިވެހިރާއްޖޭގައި މިވަގުތު ހުރި ރައީސުލްޖުމްހޫރިއްޔާ ނަންގަވާނެ. އަޅުގަނޑުމެން އޭގައި ޑިސްކަސްކޮށްފައި އިންޑަސްޓްރީގެ ކޮންސާންސް ރައީސްގެ އަރިހަށް ގެންދިޔައީ އަޑުއަހާނެ އަދި އެކަމަށް ހުރި ހައްލުތައް ހޯދާނެ،" ފައިސަލް ވިދާޅުވި އެވެ. 

ފައިސަލް އިތުރަށް ވިދާޅުވީ ޓޫރިޒަމް ދާއިރާގައި ގެސްޓުހައުސްތައް ވަކިން ޕްރޮމޯޓުކުރުމަށް އޭނާ ބޭނުންފުޅުވާ ކަމަށެވެ. އެއީ ގެސްޓުހައުސްތައް ޕްރޮމޯޓުކުރުމަކީ ރާއްޖޭގެ ޕްރައިވެޓް ސެކްޓާ ވަރަށް ބޮޑަށް ވަރުގަދަވާނެ ކަމެއް ކަމުގައި ފެނިވަޑައިގަންނަވާތީ ކަމަށް މިނިސްޓަރު ވިދާޅުވި އެވެ.