ރޫޕޭ ކާޑާއެކު ކަޅުބާޒާރުގައި ޑޮލަރަށް އޮތް ޑިމާންޑު ކުޑަވާނެ: ފައިސަލް

އިންޑިޔާގެ ރޫޕޭ ކާޑު ރާއްޖޭގައި ބޭނުންކުރަން ފެށުމުން ކަޅު ބާޒާރުގައި ޑޮލަރަށް އޮތް ޑިމާންޑު ވަރަށް ބޮޑަށް ކުޑަވާނެ ކަމުގައި ޓޫރިޒމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ. 

ރާއްޖޭގައި ރޫޕޭ ކާޑު ބޭނުންކުރެވޭނެ އިންތިޒާމުތައް ހަމަޖެއްސުމުގެ މަޝްވަރާތައް ފެށުނީ 2019 ވަނަ އަހަރު ކުރީގެ ރައީސް އިބްރާހީމް މުހައްމަދު ސޯލިހުގެ ދައުރުގަ އެވެ. ނަމަވެސް އެއިރު ރުޕޭ ކާޑު ބޭނުންކުރަން ފެށުމުގެ މަސައްކަތް އޮތީ މަޑުޖެހިފަ އެވެ. 

މި ސަރުކާރު ވެރިކަމާ ހަވާލުވެ އިންޓަނޭޝަނަލް ޕޭމެންޓު ސިސްޓަމްތައް ރާއްޖޭގައި ބޭނުންކުރެވޭ މިންވަރު އިތުރުކުރުމުގެ މަސައްކަތް ފެށި އެވެ. އެގޮތުން ޗައިނާގެ ކާޑެއް ބޭނުންކޮށްގެން ޕޭމެންޓު ހެދުމުގެ ފުރުސަތުވެސް ސަރުކާރުންވަނީ ހުޅުވާލާފަ އެވެ. 

ރޫޕޭ ކާޑު ރާއްޖޭގައި ބޭނުންކުރަން ފެށީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިންޑިޔާއަށް ކުރައްވަމުންގެންދަވާ ފުރަމާނަ ދަތުރުފުޅުގެ ތެރެއިން އިންޑިޔާގެ ބޮޑުވަޒީރު ނަރެންދުރަ މޯދީއާއެކު ބޭއްވެވި މަޝްވަރާ ބައްދަލުވުންތަކަށް ފަހު އެވެ. 

ރޫޕޭ ކާޑު ބޭނުންކޮށްގެން އިންޑިޔާގެ ފަތުރުވެރިންނަށް ރުޕޭ ބޭނުންކުރެވޭއިރު، ދިވެހިރާއްޖެއަށް މުދާ އިމްޕޯޓުކުރުމަށް ރުޕޭ ކާޑު ބޭނުންކުރެވޭނެކަން ފައިސަލް ފާހަގަކުރެއްވި އެވެ. އަދި ޑުބައި ފަދަ ގައުމުތަކުގައި ރުޕޭ ބޭނުންކުރެވޭތީ އެކަމުގެ ސަބަބުން ޑޮލަަރަށް އޮތް ޑިމާންޑު ކުޑަވާނެ ކަމުގައި ފައިސަލް ފާހަގަކުރެއްވި އެވެ.